Sipas të dhënave më të fundit të publikuara nga Eurostat, në shkurt 2026, niveli i fluturimeve në Bashkimin Europian mbetet ende 3.6% më i ulët krahasuar me shkurtin e vitit 2019, duke treguar se rikuperimi i plotë nuk është arritur ende në të gjitha vendet.
Në këtë aspekt, Shqipëria spikat dukshëm, duke regjistruar rritjen më të lartë ndër të gjitha vendet e analizuara, me një rritje prej 126.2%. Ky zhvillim lidhet ngushtë me rritjen e fortë të turizmit, zgjerimin e linjave ajrore dhe shtimin e operatorëve “low-cost”, që kanë kthyer vendin në një nga destinacionet më dinamike në rajon.
Pas Shqipërisë renditen Islanda (56.9%), Malta (55.2%), Bosnje & Hercegovina (54.0%) dhe Serbia (53.6%), të cilat gjithashtu kanë kaluar ndjeshëm nivelet para pandemisë. Edhe Maqedonia e Veriut (+45.4%) dhe Greqia (+32.9%) konfirmojnë një trend pozitiv në rajonin e Ballkanit, duke reflektuar një kërkesë të lartë për udhëtime dhe turizëm.
Në Europën Qendrore dhe Jugore, vendet si Polonia (+24.2%), Turqia (+19.2%), Spanja (+17.5%) dhe Portugalia (+15.5%) kanë arritur të tejkalojnë nivelet e vitit 2019, duke përfituar nga rikthimi i turizmit ndërkombëtar dhe rritja e lëvizjes së pasagjerëve. Ndërkohë, vende si Italia dhe Rumania shënojnë rritje më të moderuar, por gjithsesi pozitive.
Në kontrast, disa nga ekonomitë më të mëdha të Europës vazhdojnë të mbeten nën nivelet para pandemisë. Gjermania (-24.8%), Suedia (-32.1%) dhe Sllovenia (-36.8%) regjistrojnë rënie të ndjeshme, ndërsa edhe Franca (-4.9%), Holanda (-7.1%) dhe Mbretëria e Bashkuar (-7.0%) nuk kanë arritur ende rikuperim të plotë. Këto diferenca lidhen shpesh me ndryshimet në strukturën e tregut ajror, politikat mjedisore dhe kostot e operimit.
Në të njëjtën kohë, vendet nordike si Finlanda (-12.4%) dhe Norvegjia (-14.1%) vijojnë të mbeten në nivele më të ulëta, duke reflektuar një rikuperim më të ngadaltë të kërkesës për fluturime.
Shqipëria, në këtë kontekst, po konsolidohet si një nga tregjet me rritjen më të shpejtë në kontinent, duke përfituar nga zhvillimi i turizmit dhe pozicioni i saj gjithnjë e më tërheqës në hartën evropiane të udhëtimeve ajrore./Scan TV
