Pasagjerët që udhëtojnë me kompaninë ajrore Ryanair duhet të tregojnë kujdes me orarin e kryerjes së check-in, pasi nga data 10 nëntor 2026 do të zbatohet një afat i ri për mbylljen e kësaj procedure. Check-in për të gjitha fluturimet e kompanisë do të mbyllet 60 minuta përpara orarit të planifikuar të nisjes.
Njoftimi është i rëndësishëm për të gjithë udhëtarët që përdorin shërbimet e Ryanair, përfshirë ata që nisen nga Aeroporti Ndërkombëtar i Tiranës.
Sipas njoftimit, duke filluar nga 10 nëntori, pasagjerët duhet të sigurohen që procedura e check-in të jetë përfunduar brenda afatit të përcaktuar, në mënyrë që të shmangin probleme gjatë udhëtimit.
Kjo do të thotë se, për një fluturim të planifikuar në orën 12:00, afati i fundit për përfundimin e check-in do të jetë ora 11:00.
Në njoftim, udhëtarëve u rekomandohet të mbërrijnë në aeroport mjaftueshëm herët për të përfunduar të gjitha procedurat e nevojshme përpara nisjes.
Kjo përfshin kontrollin e dokumenteve të udhëtimit, dorëzimin e bagazheve kur është e nevojshme dhe procedurat e sigurisë aeroportuale.
Pasagjerët duhet të kenë parasysh se afati i mbylljes së check-in nuk është i njëjtë me orarin e mbylljes së portës së imbarkimit, ndaj duhet të respektojnë edhe oraret e tjera të përcaktuara për fluturimin.
Për të shmangur vonesat dhe komplikacionet, udhëtarëve u rekomandohet të kontrollojnë paraprakisht rezervimin, të kryejnë check-in online sipas kushteve të kompanisë dhe të verifikojnë dokumentet e nevojshme për destinacionin ku do të udhëtojnë. /ekofin.al
