Një kompani holandeze thotë se ka zhvilluar një mënyrë për të përdorur inteligjencën artificiale (AI) për të regjistruar ëndrrat.
Modem Works, një studio dizajni dhe qendër mendimi me qendër në Amsterdam, pretendon se “Dream Recorder” (Regjistruesi i Ëndrrave) mund të kapë përmbajtjen e ëndrrave në një “definicion ultra të ulët” dhe në çdo gjuhë.
“Zgjohu, thuaje ëndrrën me zë të lartë… dhe shikoje të shndërrohet në një peizazh ëndrrash me stilin estetik që ti zgjedh,” thuhet në faqen e internetit të projektit.
Si funksionon?
Modem Works thotë se projekti është “Bëje vetë sipas dizajnit”. Përdoruesit e ardhshëm udhëzohen të shkarkojnë kodin me burim të hapur, të mbledhin pjesët e nevojshme, të printojnë në 3D mbështjellësin e pajisjes dhe të montojnë gjithçka vetë.
Pasi pajisja të jetë montuar, përdoruesi mund të trokasë dy herë për të nisur regjistrimin e kujtimeve të ëndrrës, dhe pas përfundimit, gjenerohet një version vizual i saj. Një trokitje tjetër e shfaq ëndrrën e krijuar, së bashku me deri në shtatë të tjera që ruhen në një procesor të vogël me 8 gigabajt memorie.
Kompania ka publikuar kodin me burim të hapur në GitHub – një platformë ku ndahen projekte programimi – së bashku me një listë të pjesëve të nevojshme dhe se ku mund të blihen.
Pjesët për “Dream Recorder”-in përfshijnë një ekran HDMI, një procesor 8 GB, një kartë micro SD dhe një mikrofon USB. Sipas zhvilluesve, kostoja totale për të ndërtuar pajisjen është rreth 285 euro.
Pajisja kërkon gjithashtu pagesë për përdorimin e API-ve të OpenAI dhe të kompanisë së gjenerimit të videove me AI LumaLabs, të cilat ndihmojnë në krijimin e imazheve të ëndrrës. Kostoja për çdo ëndërr të krijuar vlerësohet të jetë më pak se 0.01 deri në 0.14 dollarë amerikanë, në varësi të cilësisë së imazhit.
“Dream Recorder” është përpjekja më e fundit për të hartuar përmbajtjen e ëndrrave me ndihmën e inteligjencës artificiale. Në vitin 2023, ATR Computational Neuroscience Laboratories në Japoni zhvilloi një sistem AI që përdor skanime MRI për të vizualizuar dhe regjistruar ëndrrat me një saktësi prej 60%.
Një tjetër studim paraprak nga Universiteti Kombëtar i Singaporit dhe Universiteti Kinez i Hong Kongut arriti në përfundime të ngjashme po gjatë vitit 2023./Përshtati nga Euronews, ekofin.al
