Krimet kibernetike janë ato që shënuan rritjen më të madhe në vitin 2024, me 44.5% më shumë krahasuar me një vit më parë. Referuar të dhënave për veprat penale të publikuara nga INSTAT, gjatë vitit të kaluar janë evidentuar gjithsej 32.653 vepra penale, 3,5% më pak, krahasuar me vitin 2023. Ndërkohë numri i autorëve të dyshuar për vepra penale në vitin 2024 arriti në 40.057, me një rritje prej 1,4%, krahasuar me vitin paraardhës. 93,7% janë meshkuj, ndërsa grupmosha më e përfaqësuar është ajo 30-44 vjeç, me 36,0% të autorëve që kryejnë vepra penale.
Në vitin 2024, janë regjistruar 17.761 persona të dëmtuar, 4,3 % më shumë, krahasuar me vitin 2023. 37,9 % e tyre janë të dëmtuar për krime kundër personit, ndërsa femrat përbëjnë 38,8 % të kësaj kategorie, kryesisht në krime seksuale, krime kundër fëmijëve, martesës dhe familjes, si edhe në krime kundër moralit dhe dinjitetit.
Edhe numri i procedimeve penale të regjistruara në vitin 2024 u rrit me 3,4%, duke arritur në 24.912. Nga 25.272 procedime penale të përfunduara, 36,6 % e tyre janë pushuar, 26,8 % janë pezulluar dhe 36,6 % janë dërguar për gjykim në gjykatë.
Në vitin 2024, janë regjistruar 13.167 persona të pandehur, 5,7 % më pak, krahasuar me një vit më parë. Meshkujt përbëjnë 94,6 % të numrit gjithsej të të pandehurve, pothuajse e njëjta përqindje përgjatë pesë viteve të fundit.
Numri i të burgosurve në institucionet e ekzekutimit të vendimeve penale është 4.491, 13,1 % më pak, krahasuar me vitin 2023. Meshkujt përbëjnë 98,3 % të numrit gjithsej të të burgosurve.
Veprat penale: krime kibernetike, përndjekje, vrasje me dashje, vjedhje duke shpërdoruar detyrën, dhuna në familje, pastrim i produkteve të veprës penale, krime seksuale, krime me dashje kundër shëndetit dhe shkelja e rregullave të qarkullimit rrugor janë rritur krahasuar me vitin e kaluar, ndërsa pjesa tjetër e veprave penale ka pësuar rënie.
Në vitin 2024, 36,0 % e autorëve janë të grupmoshës 30-44 vjeç, 24,8 % të grupmoshës 18-29 vjeç dhe 22,8 % i përkasin grupmoshës 45-59 vjeç. /ekofin.al
