Agjencia ndërkombëtare e vlerësimit të kreditit Standard & Poor’s Global Ratings (S&P) ka rikonfirmuar vlerësimin afatgjatë të kreditit sovran të Shqipërisë në “BB”, duke ruajtur njëkohësisht perspektivën “të qëndrueshme”.
Në raportin analitik të publikuar më 21 shtator 2026, S&P vlerëson se ekonomia shqiptare ka treguar rezistencë ndaj goditjeve të njëpasnjëshme të viteve të fundit, ndërsa të ardhurat për frymë janë rritur ndjeshëm. Sipas agjencisë, si borxhi publik, ashtu edhe borxhi i jashtëm janë në trajektore rënëse.
Ekonomia shqiptare është rritur mesatarisht me rreth 4% në terma realë gjatë periudhës 2022–2025. Për vitin 2026, S&P parashikon rritje të Prodhimit të Brendshëm Bruto prej 3.4%, nga 3.7% në vitin 2025. Për periudhën 2027–2029, rritja pritet të jetë mesatarisht rreth 3% në vit.
Sipas agjencisë, aktiviteti ekonomik do të vijojë të mbështetet nga eksportet e shërbimeve, konsumi privat dhe investimet. Pozicioni i jashtëm i vendit është forcuar, i ndihmuar veçanërisht nga performanca e turizmit, ndërsa deficitet e llogarisë korente janë ngushtuar ndjeshëm gjatë viteve 2023–2025.
Borxhi publik drejt 50.5% të PBB-së
Në vlerësimin e financave publike, S&P e konsideron pozicionin fiskal të Shqipërisë relativisht të fortë krahasuar me tregjet në zhvillim dhe vlerëson kuadrin fiskal si të kujdesshëm.
Agjencia parashikon një deficit buxhetor prej 2% të PBB-së në vitin 2026, nën kufirin prej 2.3% të përcaktuar nga autoritetet shqiptare. Për periudhën deri në vitin 2029, deficiti pritet të mbetet mesatarisht rreth 2% e PBB-së.
S&P vlerëson se objektivat e përcaktuara në rregullat fiskale të Ligjit Organik të Buxhetit janë të arritshme dhe nënvizon se Shqipëria ka regjistruar suficit primar që prej vitit 2023.
Ndërkohë, borxhi publik parashikohet të vijojë rënien, duke zbritur në 50.5% të PBB-së në fund të vitit 2029, nga 52.9% në vitin 2025.
BE-ja dhe turizmi forcojnë pozicionin e jashtëm
Një tjetër element pozitiv i evidentuar në raport është procesi i anëtarësimit të Shqipërisë në Bashkimin Evropian. S&P vëren progresin në reformën në drejtësi dhe në luftën kundër korrupsionit dhe krimit të organizuar, si dhe hapjen e të gjashtë grupkapitujve negociues.
Rezervat valutore kanë shënuar gjithashtu rritje. Në fund të korrikut 2026, ato arritën në 8.1 miliardë euro, ose rreth 27% të PBB-së. Sipas S&P, rritja është mbështetur nga prurjet e eksporteve të shërbimeve, veçanërisht turizmit, si dhe nga Investimet e Huaja Direkte, të cilat kanë mbuluar deficitet e llogarisë korente.
Bankat, likuiditet dhe më pak kredi të këqija
Sektori bankar shqiptar vijon të karakterizohet nga likuiditeti, kapitalizimi i mirë dhe përfitueshmëria e qëndrueshme.
Një tregues i rëndësishëm i evidentuar nga S&P është niveli i kredive me probleme. Në fund të korrikut 2026, kreditë e këqija përbënin rreth 4%, ndjeshëm më pak se niveli prej 11% i regjistruar përpara pandemisë.
