Tregtia me pakicë vijon të zgjerohet, me volumin e shitjeve që në tremujorin e dytë të vitit 2026 u rrit me 6.8% krahasuar me të njëjtën periudhë të një viti më parë.
Sipas të dhënave të publikuara nga INSTAT, indeksi i volumit të shitjeve në tregtinë me pakicë arriti në 125.0, ndërsa krahasuar me tremujorin e parë të vitit, volumi i shitjeve u rrit me 1.6%, i përshtatur sezonalisht.
Rritja nuk është e përqendruar vetëm te një kategori. Artikujt jo-ushqimorë dhanë kontributin më të madh në zgjerimin e tregtisë me pakicë, me 2.7 pikë përqindje, të ndjekur nga tregtia e hidrokarbureve me 2.1 pikë përqindje dhe ushqimet, pijet e duhani me 2 pikë përqindje.
Hidrokarburet me rritjen më të fortë
Tregtia me pakicë e hidrokarbureve në njësi tregtare të specializuara regjistroi një rritje vjetore prej 8.4%, duke performuar më mirë se tregtia me pakicë në total. Edhe në raport me tremujorin e parë të vitit, volumi i shitjeve të hidrokarbureve u rrit me 2.1%.
Ndërkohë, duke përjashtuar hidrokarburet, tregtia me pakicë shënoi një rritje vjetore prej 6.3%.
Artikujt jo-ushqimorë mbajnë ritëm të fortë
Në bazë të ndryshimit vjetor, shitjet e artikujve jo-ushqimorë u rritën me 6.4%, ndërsa grupi ushqime, pije dhe duhan shënoi rritje prej 6.0%.
Të dhënat tregojnë gjithashtu se ritmi i rritjes është ruajtur edhe në terma tremujorë. Artikujt jo-ushqimorë u rritën me 1.9% kundrejt tremujorit të parë, ndërsa ushqimet, pijet dhe duhani shënuan një rritje më të moderuar prej 0.4%.
Në tërësi, shifrat e tremujorit të dytë tregojnë një zgjerim të aktivitetit të shitjeve me pakicë, ku rritja është mbështetur njëkohësisht nga konsumi i produkteve të përditshme, artikujve jo-ushqimorë dhe hidrokarbureve./ekofin.al

