Çmimet e naftës u rritën të hënën në mëngjes dhe tregjet evropiane u hapën në rënie, pasi presidenti amerikan Donald Trump dërgoi një paralajmërim të ri ndaj Iranit përmes rrjeteve sociale.
Kontratat futures të naftës Brent për muajin korrik u rritën me 1.81%, duke u tregtuar me 111.27 dollarë për fuçi, ndërsa kontratat e naftës amerikane West Texas Intermediate (WTI) për qershorin fituan 2.15%, duke arritur në 107.69 dollarë për fuçi, teksa investitorët vlerësuan mesazhin më të fundit të Presidentit Trump drejtuar Iranit.
Në një postim në platformën e tij Truth Social, ai shkroi të dielën: “Për Iranin, ora po ecën dhe ata duhet të lëvizin SHPEJT, përndryshe nuk do të mbetet asgjë prej tyre. KOHA ËSHTË THELBËSORE!”
Uashingtoni ndodhet në konflikt me Teheranin që prej momentit kur forcat amerikane dhe izraelite nisën sulme të mëdha ndaj republikës islamike në fund të shkurtit. Që atëherë, është bërë pak përparim drejt përfundimit të luftës, e cila ka çuar në rritjen e ndjeshme të çmimeve globale të energjisë.
Një sulm me dron gjatë fundjavës ndaj një centrali bërthamor në Emiratet e Bashkuara Arabe shtoi më tej shqetësimet për një përshkallëzim të mundshëm të konfliktit.
Në tregjet e tjera të hënën herët, tregjet në Japoni dhe Korenë e Jugut u tërhoqën më tej nga nivelet rekord. Indeksi Nikkei 225 i Tokios ra me 0.9% në 60,843.09 pikë, me rënien të udhëhequr nga aksionet e teknologjisë, pasi javën e kaluar kishte arritur nivele rekord mbi 63,000 pikë gjatë ditës.
Rendimenti i obligacionit 10-vjeçar të qeverisë japoneze u rrit në 2.8%, niveli më i lartë që nga fundi i viteve 1990. Kjo vjen si pjesë e një tendence drejt normave më të larta të interesit, ndërsa Banka e Japonisë po rrit gradualisht normat dhe kostot më të larta të energjisë po shtojnë pritshmëritë për inflacion më të lartë. Vetëm një javë më parë, rendimenti ishte rreth 2.55%.
Indeksi Kospi i Seulit u rrit me 0.9% në 7,558.50 pikë, pasi më herët gjatë ditës kishte tregtuar në rënie. Të premten ai kishte kaluar nivelin 8,000, i mbështetur nga blerjet e aksioneve të teknologjisë të nxitura nga bumi i inteligjencës artificiale, por më pas ra pjesërisht për shkak të realizimit të fitimeve nga investitorët.
Indeksi Hang Seng i Hong Kongut humbi 1.6%, duke zbritur në 25,543.32 pikë. Ndërkohë, indeksi Shanghai Composite ra lehtë me 0.1% në 4,132.24 pikë, pasi Kina raportoi të dhëna më të dobëta se pritshmëritë për shitjet me pakicë në prill.
Indeksi australian S&P/ASX 200 ra me 1.4% në 8,508.40 pikë, ndërsa Taiex i Tajvanit humbi 1.1%. Sensex i Indisë ra me 0.6%.
Në tregjet valutore, dollari amerikan u rrit në 159.02 jen japonez nga 158.62 jen, ndërsa euro tregtohej me 1.1626 dollarë, nga 1.1622 dollarë më parë.
Rënia e Wall Street nga nivelet rekord
Kontratat futures të aksioneve amerikane tregtoheshin pothuajse pa ndryshim, pasi tregu amerikan i aksioneve ra nga nivelet rekord të premten dhe iu bashkua rënies globale të aksioneve, ndërsa çmimet më të larta të naftës shkaktuan shqetësime në tregun e obligacioneve. Aksionet e lidhura me entuziazmin për teknologjinë e inteligjencës artificiale udhëhoqën rënien.
Indeksi S&P 500 ra me 1.2% nga niveli rekord i arritur një ditë më parë. Dow Jones Industrial Average humbi 537 pikë, ose 1.1%, ndërsa Nasdaq Composite ra me 1.5% nga rekordi i tij historik.
Aksionet e teknologjisë pësuan një kthesë të fortë negative pas rritjeve të jashtëzakonshme gjatë pjesës më të madhe të vitit, të cilat kishin çuar tregjet globale drejt rekordeve, por gjithashtu kishin nxitur kritika se çmimet ishin rritur tepër.
Nvidia, kompania që është bërë simbol i revolucionit të inteligjencës artificiale, ra me 4.4% dhe pati ndikimin më të madh negativ në indeksin S&P 500. Para kësaj rënieje, aksioni kishte fituar më shumë se 26% që nga fillimi i vitit.
Micron Technology ishte një tjetër kompani që ndikoi ndjeshëm në rënien e tregut, pasi aksionet e saj ranë me 6.6%. Megjithatë, ato mbeten ende rreth 154% më të larta krahasuar me fillimin e vitit.
“Sipas nesh, tregjet kanë hyrë në territor të mbiblerë,” tha Brian Jacobsen, strateg kryesor ekonomik në Annex Wealth Management. Ai shtoi se fitimet e forta të kompanive dhe ekonomia e qëndrueshme amerikane që çuan aksionet drejt rekordeve mbeten të paprekura, por “rruga nuk ka gjasa të jetë e qetë. Periudha si kjo kërkojnë më shumë disiplinë sesa shpresë.” /Përshtati nga Euronews, ekofin.al
