Kryeministri Edi Rama deklaroi sot nga Dibra se sfida kryesore për zhvillimin e bujqësisë nuk lidhet më me mungesën e financimit, por me cilësinë e projekteve dhe angazhimin e vetë fermerëve dhe pushtetit vendor.
Në një takim me fermerët, në kuadër të turit “Punët e Shqipërisë”, Rama theksoi rëndësinë e rritjes së investimeve dhe përmbushjes së standardeve për tregun e Bashkimit Evropian.
“Nuk është më problemi tek paratë. Duhet ta kuptojnë të gjithë ata që duan të punojnë me tokën, të investojnë në tokë apo të hapin pika grumbullimi. Sot kemi nevojë të prodhojmë jo vetëm mollë dhe qershi, por edhe nënprodukte, t’i përpunojmë ato si reçel, komposto etj., për t’u rritur vlerën”, u shpreh Kryeministri.
Ai nënvizoi se produktet e klasit të parë duhet të eksportohen, ndërsa ato të klasit të dytë dhe të tretë duhet të përpunohen për të rritur vlerën e tyre në treg.
“Për të hapur një pikë grumbullimi, një pikë përpunimi, një baxho apo një agroturizëm, nuk është më problemi tek paratë. Problemi është thjesht tek projekti dhe aplikimi, sepse fondet janë në dispozicion”, tha Rama.
Kreu i qeverisë bëri të ditur se shumë shpejt do të firmoset një marrëveshje me bankat dhe Bankën e Shqipërisë për krijimin e një linje kredie me interes të ulët dhe me garanci shtetërore për sipërmarrësit në bujqësi.
“Brenda pak ditësh, në fund të këtij muaji ose në fillim të muajit tjetër, do të vendosim në dispozicion një linjë kredie për të gjithë ata që duan të zgjerojnë ose të dyfishojnë sipërmarrjen e tyre”, u shpreh ai.
Rama u ndal edhe te roli i bashkive, duke theksuar se ato duhet të jenë më aktive në mbështetje të fermerëve dhe zhvillimit rural.
“Askush nuk ka më alibi, as kryetarët e bashkive. U kam thënë qartë: nëse nuk realizoni të paktën 10 agroturizma përmes paketës së maleve dhe nuk krijoni të paktën 3 shoqëri të bashkuara, mos pretendoni të kandidoni më. Bashkitë nuk janë vetëm për rrugë, ndriçim dhe pastrim, por duhet të jenë aleatët e fermerëve”, deklaroi Kryeministri.
Ai theksoi potencialin e madh të Dibrës në bujqësi dhe turizëm, duke nënvizuar ndikimin pozitiv të Rrugës së Arbrit në rritjen e aksesit dhe zhvillimit ekonomik të zonës.
“Pasuria e Dibrës është tek toka, tek bujqësia dhe tek turizmi. Me Rrugën e Arbrit, kjo zonë bëhet më e aksesueshme si për vizitorët nga Tirana, ashtu edhe për ata që vijnë nga jashtë vendit”, tha Rama.
Kryeministri shtoi se përfituesit e parë të paketës së maleve do të kenë lehtësi të konsiderueshme fiskale.
“500 të parët që do të marrin lejen për agroturizëm do të jenë për 10 vjet pa asnjë taksë. Kjo është e përcaktuar me ligj”, u shpreh ai.
Rama theksoi se bashkitë duhet të nxisin krijimin e sipërmarrjeve në fshat për prodhimin, grumbullimin dhe përpunimin e produkteve bujqësore, në mënyrë që banorët ruralë të sigurojnë mirëqenie dhe jo thjesht mbijetesë.
Në fjalën e tij, kryeministri Rama tha se “ju falënderoj që interesoheni seriozisht për këtë fazë ku ne nuk jemi më të dëshiruar, por të detyruar të hyjmë që është faza e bashkimit, e bashkimit që bën fuqinë jo ashtu siç thonë çyrykët që vijnë vërdallë për të hedhur baltë mbi çdo gjë”.
“Pra jo si kooperativat e dikurshme por si kooperativat e Bashkimit Europian. BE-ja funksionon me kooperativa, por ndryshe nga ato të komunizmit me kooperativat e BE-së secili prodhon më vete dhe të gjithë shesin bashkë, kaq e thjeshtë është kjo punë. Duke shitur bashkë krijojmë një volum shumë më të madh”, nënvizoi Rama.
Kreu i qeverisë u shpreh se “pra ka një pozitë negociuese shumë më të fortë me blerësit, por nga ana tjetër harmonizojnë të gjithë veprimtarinë prodhuese, pasi mbjellin me një farë, pastaj ndajnë kostot e punimit të tokës, përkujdesjes për prodhimin, pastaj grumbullojnë, ambalazhojnë dhe shesin. Shoqëri të Bashkuara Bujqësore SHBB kështu janë quajtur në ligj për të shmangur atë frikën e madhe që vjen nga trauma e të shkuarës që po na mbledhin në koperativë këta socialistët”.
Ne, vijoi Rama, kemi nxitur këtë punë prej kohësh.
“Aty ku kjo është bërë dhe është bërë përpara se ta nisnim ne dhe këtu kemi shembullin që është edhe zv/ministri Dhimitër Kote, një nga pikat ku ka lulëzuar Shqipëria rurale, bujqësore atëherë kur treçereku i tokave në Shqipëri nuk punoheshin fare në jug të vendit në Zarë, Konispol etj u krijua një model shembull ku fermerët, por edhe ata shqiptarë si ne edhe ata me frikë nga kooperativa, por ama të mençur për të thënë që do shesim mandarina do i shesim bashkë që kur të vijnë ata grosistët ne të kemi një volum të madh dhe të kemi forcë dhe jo mbledhim copa- copa”, nënvizoi Rama.
Kryeministri Rama tha se “këtu duhet bashkim dhe për këtë arsye ne kemi vendosur edhe mbështetje për bashkimin, mbështetje financiare, institucionale dhe aleancë me shtetin . Në Dibër SHBB ndërtohet mes fermerëve dhe bashkisë, ku bashkia është aksionere, por nuk është aksionere që t’iu marrë ju fitimet është aksionere me një kompani ku emrin ia kishit gjetur “Dibra origine” për tregun europian, që fillon dhe bëhet një markë”.
Në të kundërt, vijoi Kryeministri, nuk e përballojmë dot përplasjen e madhe që do të vijë kur ne të bëhemi anëtarë të BE-së.
“Gjithë ai treg i madh ne do dalim tek e tek e do mbijetojmë, ku do ti shesim produktet me çanta në rrugët e Brukselit. Si do realizohet siguria ushqimore do shkojnë të gjithë tek e tek të bëjnë analiza në laboratorë do paguajnë për të bërë analizat. Si do ulen kostot e prodhimit, nëse një traktor, një autokombanjë, një zetor duhet ta kesh vetë duhet ta ushqesh e duhet ta mirëmbash vetë është ndryshe po ta kesh me pesë të tjerë, 10, 15 e 30 e ta ushqeni bashkërisht e ta mirëmbani bashkërisht”, tha Rama.
