Qeveria ka vendosur sot që shtesa mujore që marrin individët me statusin e invalidit, të indeksohet në të njëjtën mënyrë dhe përqindje si pensionet, ndërsa përjashtimisht për vitin 2025, indeksohet sipas indeksit të parashikuar në vendimin nr.582, datë 18.09.2024, të Këshillit të Ministrave, “Për indeksimin e pensioneve”.
Shtesa mujore e invalidit paguhet nga Instituti i Sigurimeve Shoqërore së bashku me pensionin e invaliditetit apo të pleqërisë, në qendrat paguese të Postës Shqiptare apo në bankat e nivelit të dytë, sipas kërkesës së përfituesit.
Aktualisht, personave përfitues, sipas përcaktimit të ligjit Për statusin e invalidit”, të ndryshuar, u jepet një shtesë mujore mbi pensionin e invaliditetit, si përfitim paaftësie, në masën:
-3300 (tre mijë e treqind) lekë në muaj, nëse janë invalidë të plotë, nga sëmundje të përgjithshme;
-2200 (dy mijë e dyqind) lekë në muaj, nëse janë invalidë të pjesshëm, nga sëmundje të përgjithshme;
– 4000 (katër mijë) lekë në muaj, nëse janë invalidë të plotë, nga aksidentet në punë dhe sëmundjet profesionale;
-2700 (dy mijë e shtatëqind) lekë në muaj, nëse janë invalidë të pjesshëm, nga aksidentet në punë dhe sëmundjet profesionale.
Zbatimi i ngarkohet Ministrisë së Financave, Ministrisë së Shëndetësisë dhe Mbrojtjes Sociale, Ministrisë së Ekonomisë, Kulturës dhe Inovacionit, si dhe Institutit të Sigurimeve Shoqërore.
Ky vendim hyn në fuqi pas botimit në “Fletoren zyrtare” dhe i shtrin efektet nga data 1 janar 2025./ ekofin.al
