Kompanitë franceze Danone dhe Nestlé panë një rënie të mëtejshme të çmimeve të aksioneve të tyre, pas një krize sigurie që lidhet me qumështin formulë për foshnje.
Rreth mesditës në Evropë, aksionet e Danone ranë me 0.48%, ndërsa ato të Nestlé u ulën me 0.33%.
Disa autoritete kombëtare kanë lëshuar paralajmërimet e tyre pas njoftimit fillestar të tërheqjes nga tregu nga Danone të premten e kaluar.
Kompania franceze tha se po tërhiqte nga tregu “një numër shumë të kufizuar të loteve specifike” të qumështit formulë për foshnje, të lidhura me frikën se mund të jenë të kontaminuara me një toksinë të rrezikshme. Substanca në fjalë, cereulide, mund të shkaktojë të përziera dhe të vjella.
Tërheqja erdhi pasi Nestlé, një nga konkurrentët e Danone, njoftoi më herët në janar se do të tërhiqte lote të caktuara të formulës së saj për foshnje nga raftet.
Ky veprim global pasoi një tërheqje më të vogël në dhjetor, kur cereulide u gjet për herë të parë në një fabrikë të Nestlé në Nunspeet, Holandë.
Analistët vlerësojnë se tërheqja mund t’i kushtojë Nestlé mbi 1 miliard euro, megjithëse kompania ka deklaruar se nuk parashikon një goditje të ndjeshme financiare. Megjithatë, kompania do të punojë për të përmirësuar imazhin e saj publik dhe për të shuar dyshimet mbi sigurinë e produkteve.
Kontaminimet e zbuluara nga kompanitë janë gjurmuar të gjitha te një furnizues i vetëm kinez i vajit të acidit arahidonik, një përbërës kritik në formulat premium për foshnje.
Kompania private Lactalis është prekur gjithashtu, së bashku me firma më të vogla si Vitagermine dhe Hochdorf Swiss Nutrition.
Autoritetet franceze po hetojnë aktualisht vdekjet e dy foshnjave që raportohet se kanë konsumuar formulë për foshnje të Nestlé, të prekur nga tërheqjet për shkak të kontaminimit me cereulide. Deri tani, nuk është vendosur asnjë lidhje shkakësore.
“Po i ndjekim zhvillimet me vëmendjen e duhur dhe mbetemi plotësisht të disponueshëm për autoritetet, duke bashkëpunuar me transparencë të plotë,” tha një zëdhënës i Nestlé javën e kaluar.
Sipas analistëve të Bernstein, formula për foshnje përbën rreth 21% të të ardhurave të grupit Danone. Për Nestlé, kjo kategori ka të ngjarë të përfaqësojë rreth 5%.
Në deklaratën e saj për tërheqjen, Danone theksoi se “nuk bën kurrë kompromis me sigurinë ushqimore”, duke shtuar se prioriteti i saj “është të sigurojë që prindërit dhe profesionistët e shëndetësisë të mund të vazhdojnë të kenë besim në sigurinë dhe cilësinë e produkteve tona të formulës për foshnje”.
Duke kërkuar ndjesë për tërheqjen, Nestlé tha se masa ishte “në përputhje me… protokollet e rrepta të cilësisë dhe sigurisë së produkteve”./Përshtati nga Euronews, ekofin.al
