Leku ka vijuar mbiçmimin ndaj Euros dhe valutave të tjera kryesore edhe në tre-mujorin e tretë, edhe pse me një ritëm më të ngadalësuar krahasuar me 6 muajt e parë të vitit. Referuar analizës së bërë në Raportin e Politikës Monetare të Bankës së Shqipërisë, kursi i këmbimit të Lekut ndaj valutave kryesore vijoi të karakterizohet nga presione forcuese edhe gjatë tremujorit të tretë. Mbiçmimi i Lekut u rishfaq prej muajit gusht, ndonëse jo me të njëjtën shpejtësi si në fillim të tremujorit të dytë të vitit.
Kursi i këmbimit të Lekut ndaj Euros zbriti gradualisht në 100.0 në gusht, e më tej në 99.4 në shtator, pas qëndrueshmërisë në një mesatare prej 100.4 të vërejtur në periudhën maj – korrik. Kjo tendencë ka vijuar edhe gjatë javëve të para të muajit tetor, ku një euro u kuotua me mesatarisht 98.7 lekë.
Ndërkohë, pasi shënoi nivelin më të ulët prej 2.8% në muajin korrik, mbiçmimi vjetor u thellua në tre muajt pasues, duke shënuar vlerën mesatare prej 6.4%. Ky nivel është gjithsesi nën normën mesatare të mbiçmimit prej 9.3% të vërejtur gjatë gjashtë muajve të parë të vitit, vëren Banka e Shqipërisë.
Megjithëse ka shtuar operacionet e saj në tregun valutor, duke shtuar madje sasinë e valuës së blerë, Banka e Shqipërisë nuk arriti ta mbajë Euro mbi kufirin “psikologjik” të 100 Lekëve.
Sa i përket kushteve të tregtimit, BSh vëren se tregu valutor vijon të karakterizohet nga rritje e vëllimeve, në linjë me zhvillimet në tregtinë e jashtme, si dhe nga kushte normale të tregtimit. Rritja vjetore e vëllimeve të tregtimit rezultoi 21% në tremujorin e tretë, duke mbetur në nivele dyshifrore, si edhe në gjysmën e parë të vitit.
Ecuri të ngjashme me Euron ka regjistruar edhe Dollari amerikan në tremujorin e tretë, duke reflektuar njëkohësisht edhe nënçmimin e tij kundrejt Euros në tregun ndërkombëtar. Kursi usd/lek zbriti në 89.4 në muajin shtator, nga 93.2 që ishte në fund të tremujorit të dytë. Në javët e para të muajit tetor, kursi usd/ lek shënon mesatarisht 90.4, ose 9.7% më poshtë se në tetor të vitit të kaluar. /ekofin.al
