Instituti i Statistikave bëri të ditur të dhënat paraprake mbi aksidentet rrugore për muajin tetor 2025, sipas të cilave janë regjistruar 116 aksidente, ku 164 persona rezultojnë të aksidentuar (të vrarë ose të plagosur). INSTAT thekson se këto të dhëna janë paraprake dhe mund t’i nënshtrohen përditësimeve të mëvonshme.
Gjatë dhjetëmujorit të parë të vitit 2025, numri i aksidenteve rrugore ka shënuar një ulje prej 16,5 %, krahasuar me të njëjtën periudhë të vitit 2024. Ky tregues sinjalizon një përmirësim të përgjithshëm të situatës së sigurisë rrugore në vend.
Në tetor 2025, 81,0 % e aksidenteve kanë ndodhur si pasojë e sjelljes së drejtuesve të mjeteve, duke e konfirmuar këtë kategori si shkakun dominues të incidenteve rrugore.
Grupmosha që ka shkaktuar numrin më të lartë të aksidenteve është ajo 25-34 vjeç, e cila zë 25,9 % të totalit të aksidenteve të regjistruara në këtë muaj.
Dita me më shumë aksidente: E Premtja – me 19,8 % të totalit.
Dita me më pak aksidente: E Marta – me 8,6 %.
Sipas të dhënave të INSTAT, numri më i lartë i aksidenteve në tetor është regjistruar gjatë fashës orare 08:00 – 12:00, duke përbërë 25,0 % të aksidenteve të muajit./ekofin.al

