Qeveria propozon një kuadër të ri ligjor që vendos kërkesa të detyrueshme të projektimit ekologjik për produktet me ndikim në energji, me synim rritjen e qëndrueshmërisë mjedisore, uljen e gjurmës së karbonit në gjithë ciklin jetësor dhe harmonizimin me rregullat e tregut të përbashkët evropian. Nisma përafrohet me Direktivën 2009/125/EC dhe përfshin dispozita kyçe nga Rregullorja (BE) 2024/1781, si pasaporta digjitale e produktit, klasifikimi i performancës dhe metodologjitë e harmonizuara teknike.
Në terma praktikë, produktet do të vendosen në treg vetëm nëse plotësojnë kërkesat eko-dizajnit dhe shoqërohen me markimin CE dhe deklaratën e konformitetit. Për herë të parë, parashikohet pasaporta digjitale e produktit, e aksesueshme elektronikisht, e cila informon përdoruesit për përdorimin, mirëmbajtjen, riciklimin dhe trajtimin në fund të jetës së produktit. Kjo transparencë pritet të rrisë ndërgjegjësimin e konsumatorëve dhe të orientojë kërkesën drejt zgjidhjeve më efikase dhe më të qëndrueshme.
Projektligji adreson edhe boshllëqet aktuale: mungesën e standardeve të detyrueshme për eko-dizajn, informimin e pamjaftueshëm të konsumatorëve dhe mbikëqyrjen jo të standardizuar të tregut. Me rregulla të qarta për vlerësimin e konformitetit dhe dokumentacionin teknik, si dhe me kompetenca të përcaktuara për autoritetet e mbikëqyrjes, synohet rritja e sigurisë juridike për operatorët ekonomikë dhe e besimit te produktet.
Kërkesat specifike për grup-produkte do të përcaktohen me vendime të Këshillit të Ministrave, duke respektuar proporcionalitetin dhe përballueshmërinë. Ndërmarrjet e vogla dhe të mesme do të mbështeten me asistencë teknike dhe materiale ndihmëse, ndërsa do të ngrihen mekanizma monitorimi e raportimi për të matur zbatimin dhe impaktin real.
Sipas Relacionit, akti nuk krijon kosto shtesë për buxhetin e shtetit; përkundrazi, të ardhurat nga masat administrative kanalizohen në buxhet. Në planin makro, priten ulje të konsumit të energjisë në sektorët rezidencial dhe industrial, reduktim i ndotjes dhe i emetimeve të gazeve serrë dhe rritje e konkurrueshmërisë së prodhuesve vendas në tregjet evropiane.
