Deri në vitin 2027, synohet reduktimi i përdorimit të pagesave me para në dorë në Shqipëri, duke inkurajuar pagesat elektronike përmes e-banking, faturave elektronike dhe rritjen e përdorimit të terminaleve POS nga bizneset.
Administrata tatimore do të zbatojë një plan masash që përfshin vendosjen e një limiti për pagesat cash mes individëve dhe uljen e shumës maksimale për transaksionet cash mes bizneseve nga 150,000 lekë. Po ashtu, do të krijohen mekanizma për të identifikuar tatimpaguesit që fragmentizojnë faturat për të shmangur kalimin e limitit ligjor.
Brenda vitit 2025, do të formohet një grup pune për të shqyrtuar uljen e komisioneve të terminaleve POS, me përfaqësues nga Ministria e Financave, Banka e Shqipërisë dhe Shoqata e Bankave.
Megjithëse ka pasur një rritje të përdorimit të kartave dhe pagesave elektronike, përdorimi i parasë cash mbetet ende i lartë në Shqipëri për shkak të kulturës së pagesave tradicionale, normave të ulëta të interesit për depozitat dhe mungesës së terminaleve POS në disa pika shitjeje.
