Peshkimi në Shqipëri po njeh rritje të vazhdueshme, duke bërë që më shumë subjekte peshkimi t’i shtohen këtij sektori. Sipas INSTAT, për vitin 2023, sasia e peshkut të zënë në gjithë kategoritë ujore ka qenë 19.338 tonë ose 8.65 % krahasuar me vitin e mëparshëm, si dhe u regjistruan 27 subjekte të reja peshkimi. Nga kategoritë ujore të peshkimit vendin e parë e zë “Akuakultura” me 47.27 %.
Projektligji i ri “Për disa shtesa dhe ndyshime në ligjin “Për peshkimin”, hartuar nga Ministria e Bujqësisë dhe Zhvillimit Rural, i hedhur për diskutim, synon të rrisë ekonominë e peshkimit dhe përmirësimin e infrastruktrave të tij, kjo edhe në përputhje me standardet e Bashkimit Evropian.
Përveç përafrimit ligjor me legjislacionin e BE-së, që rregullon dispozita të ndryshme të veprimtarisë dhe sanksionet në rast shkeljesh, parashikohet si risi një shtim i lejeve për subjektet që do të peshkojnë përtej Mesdheut.
Aktualisht numri i anijeve shqiptare që peshkojnë në Detin Mesdhe është 811, kryesuar nga Durrësi me 299 dhe Vlora 250. Me ndryshimet ligjore, këtyre subjekteve do t’u njihet e drejta për të peshkuar jo vetëm në Mesdhe, por edhe përtej tij. Kjo do të thotë një mundësi më e madhe për eksportet dhe njëkohësisht rritje e ekonomisë vendase. Për vitin 2023, eksportet e produkteve të detit arritën shifrën e 144 milionë eurove.
