Maqedonia e Veriut ka përgatitur ndryshime ligjore për të rritur kufirin e kapacitetit për prodhuesit dhe për të përshpejtuar procedurat e lejeve dhe lidhjes në rrjet për panelet diellore mbi çati.
Sipas ndryshimeve të propozuara në Ligjin për Efiçencën e Energjisë, kufiri i kapacitetit për instalimet diellore mbi çati do të rritet në 10 kilovat (kW) për familjet dhe 70 kW për personat juridikë, sipas një njoftimi të Ministrisë së Energjisë, Minierave dhe Burimeve Minerale. Aktualisht, kufiri është 6 kW për familjet dhe 40 kW për bizneset.
Po ashtu, ndryshimet parashikojnë afat njëmujor për procedurën e dhënies së lejeve për instalimin e pajisjeve diellore me kapacitet deri në 100 kW. Ky rregull do të vlejë si për prosumatorët ashtu edhe për komunitetet e energjisë, sipas projektligjit për përdorimin e energjisë së rinovueshme.
Zyra e firmës ligjore CMS në Maqedoninë e Veriut theksoi se parlamenti ka miratuar tashmë disa ndryshime në rregulloren për burimet e energjisë së rinovueshme, duke përfshirë rritjen e kufijve të kapacitetit për prodhuesit familjarë dhe ata të biznesit.
Ministria vuri në dukje se për herë të parë po vendoset një afat ligjor për dhënien e lejeve për panele fotovoltaike për prodhuesit. I njëjti afat njëmujor do të vlejë edhe për lidhjen në rrjet: operatori i sistemit të shpërndarjes do të jetë i detyruar të lidhë instalimin brenda një muaji nga data e konfirmimit zyrtar se dokumentacioni i paraqitur është i plotë.
Në rast se lidhja në vendndodhjen e kërkuar nuk është e mundur, operatori është i detyruar që brenda 15 ditëve nga dorëzimi i kërkesës për lidhje, t’i njoftojë aplikuesit me shkrim dhe t’i propozojë një pikë alternative lidhjeje.
Ndryshimet ligjore të propozuara parashikojnë gjithashtu që instalimi i kolektorëve diellorë për ujë të ngrohtë të bëhet i detyrueshëm në ndërtesat e reja publike, ose në rastet e rindërtimeve të konsiderueshme të atyre ekzistuese, nëse kjo është teknikisht dhe ekonomikisht e mundur.
Burimet e energjisë së rinovueshme përbëjnë më shumë se gjysmën e kapacitetit total prodhues të Maqedonisë së Veriut, me mbi 616 MW kapacitet të ri nga burime të rinovueshme të instaluar gjatë dy viteve të fundit, sipas të dhënave të Komisionit Rregullator për Energjinë, Shërbimet e Ujit dhe Menaxhimin e Mbetjeve Komunale./Përshtati nga Balkan Green Energy News, ekofin.al
