Banka e Shqipërisë ka publikuar ashtu siç bën çdo 6 muaj, duke nisur nga viti 2022, normat maksimale të interesit për kreditë konsumatore. Vihet re në tërësi një rënie e normave të interesit në pjesën më të madhe të linjave të kredive konsumatore.
Kështu, në linjën më të aplikuar të kredive konsumatarore, sidomos nga institucionet financiare jobanka, atë për shumat deri në 200 mijë lekë, ka një zbritje të mëtejshme, duke arritur në 95.19%, nga 100% që ishte në 6-mujorin e parë të këtij viti.
Bazuar në vlerësimet dhe kalkulimet, duhet theksuar se NEI, ose norma efektive e interesit, përfshin normën nomimale të interesit, komisionet e aplikuara nga institucioni që jep kredinë, si edhe të gjitha kostot e tjera të kredisë që i transferohen klientit.
Për shumat deri në 200 mijë lekë, NEI maksimal për overdraftet ka ka një rritje të lehtë, në 18.71%, nga 18.6% që ishte në 6-mujorin e parë.
Për kartat e kreditit, NEI maksimal është ulur në 26.27%, nga 27.4% që ishte më parë.
Ulje ka shënuar norma efektive e interesit edhe sa i përket linjës së kredive nga 200 mijë lekë deri në 600 mijë lekë, duke zbritur në 37.43%, nga 40.6% që ishte në 6-mujorin e parë të këtij viti.
Në rastin e overdrafteve, edhe për këtë linjë kredie ka një rritje, duke arritur në 18.77%, nga 17.55% që ishte më parë.
Zbritje të ndjeshme të NEI-t është shënuar për kreditë konsumatore me vlerë nga 600 mijë lekë deri në 2 milionë lekë, ku tashmë për 6-mujorin e dytë të vitit ato do të jepen me një NEI maksimal prej 12.41% nga 15.6% që ishte më parë.
Aplikimi i një norme tavan interesi për kreditë konsumatore në Shqipëri nisi në fillim të vitit të vitit 2022, pas shqetësimeve të ngritura për aplikimin e normave shumë të larta të interesit. Që prej aplikimit të rregullores së re të Bankës së Shqipërisë, NEI maksimal ka pësuar një rënie të fortë, duke zbritur nga 171.41% që ishte për kreditë me vlerë të vogël deri në 200 mijë lekë, në 95.19% që është aktualisht. Ekofin.al
