Deputetët dështuan për të nëntën herë radhazi në përpjekjen e tyre për ta konstituuar Kuvendin e Kosovës.
Më 1 maj, kryesuesi i seancës konstituive, Avni Dehari nga Lëvizja Vetëvendosje (LVV), kërkoi që votimi për kryetar të Kuvendit të bëhet në mënyrë të fshehtë, gjë që u refuzua nga partitë e tjera.
Procesi ka ngecur prej javësh pasi partia fituese, LVV, nuk po arrin t’i sigurojë votat e nevojshme për kandidaten e saj për kryetare të Kuvendit, Albulena Haxhiu.
Ajo shihet nga disa parti parlamentare si “figurë përçarëse”, por Vetëvendosje ngul këmbë se ajo është kandidate meritore.
Deputeti i Lëvizjes Vetëvendosje (LVV), Hekuran Murati, ka thënë se me refuzimin për votim të fshehtë për zgjedhjen e kryetarit të Kuvendit të Kosovës, Partia Demokratike e Kosovës (PDK), Lidhja Demokratike e Kosovës (LDK), Aleanca për Ardhmërinë e Kosovës (AAK) u panë se janë “kundër zhbllokimit, kundër konstitutimit të Kuvendit”.
Murati ka deklaruar para gazetarëve se votimi i fshehtë për konstituimin e Kuvendit u mundësua nga një vendim i Gjykatës Kushtetuese më 2014.
“PDK, LDK, AAK dhe Lista Serbe refuzuan ta zhbllokojnë procesin”, u shpreh Murati.
Ai i ka quajtur “joracionale” qëndrimet e partive që në legjislaturën e kaluar ishin në opozitë.
Murati ka thënë se partia e tij nuk tërhiqet nga qëndrimi se Albulena Haxhiu duhet të votohet kryetare e Kuvendit.
Kryetari i Lidhjes Demokratike të Kosovës (LDK), Lumir Abdixhiku, ka shprehur qëndrimin e tij pas dështimit të radhës për konstituimin e Kuvendit të Kosovës.
Nëpërmjet një shkrimi në Facebook, Abdixhiku ka akuzuar Lëvizjen Vetëvendosje (LVV) për veprim me “arbitraritet të plotë”, pas propozimit për ndërrimin e formës së votimit për kryeparlamentarin.
“A po e kuptoni tani, se pse me të tillët, nuk mund të kesh as takim e as mirëkuptim? Të takojnë, të mashtrojnë! Gjersa të thërrasin në takim, jashtë të ofendojnë. Në fund veprojnë në arbitraritet të plotë!”, është shprehur ai.
“Sepse nuk njohin njerëzoren, as fjalën as kurrizin! Kjo politikë duhet të marrë fund! LDK do t’i japë fund!”, ka shkruar Abdixhiku.
“Është interes kombëtar refuzimi i qasjes së tillë politike, jo nënshtrimi e dorëzimi para saj. Shpresoj dhe partitë tjera ta kuptojnë këtë gjë sa më parë”, ka thënë kreu i LDK-së.
“LDK e ka të qartë. Prandaj është konsistente. Para, gjatë e pas zgjedhjeve. Prandaj votuesi e mbështetësi i LDK-së sot rri krenar!”, ka përfunduar Abdixhiku.
Edhe deputetja e Lidhjes Demokratike të Kosovës (LDK), Hykmete Bajrami, ka folur para mediave pas dështimit të radhës për konstituimin e Kuvendit të Kosovës.
Ajo ka thënë se sot “u bë edhe një shkelje tjetër kushtetuese, ligjore, me arbitraritet u tentua të ndryshohet mënyra e votimit”.
“Rregullorja e Kuvendit përcakton mënyrat e votimit… Kjo përcaktohet në fillim të procesit”, është shprehur ajo.
Bajrami ka thënë se “asnjëherë në histori nuk ka ndodhur të ndryshohet procesi, dhe është shkelje që mënyra e votimit të ndryshohet pasi ka filluar procesi”.
Deputetja e LDK-së ka thënë se partia e saj sot nuk mori pjesë në takimin e ftuar nga kreu i LVV-së, Albin Kurti, pasi “nuk dëshiron të ketë një marrëveshje politike me LVV-në”.
Kryetari i Partisë Demokratike të Kosovës (PDK), Memli Krasniqi, ka folur para mediave pas dështimit të përpjekjes së nëntë për konsistituimin e Kuvendit.
Ai ka thënë se Lëvizja Vetëvendosje (LVV) e Albin Kurtit “ka vendosur ta vazhdojë talljen”, teksa ka thënë se me propozimin për ndërrim të formës së votimit LVV-ja ka bërë “shkelje të hapur kushtetuese”.
Krasniqi ka përsëritur qëndrimin e partisë së tij kundër votimit të të propozuarës së LVV-së për kryetare të Kuvendit, Albulena Haxhiu.
“Nuk kalon Albulena Haxhiu dhe pikë”, është shprehur Krasniqi.
Ai ka pyetur se çfarë borxhi i ka Kurti Haxhiut që nuk po ndryshon emrin e kandidatit për kryetar të Kuvendit, siç kanë kërkuar partitë tjera.
Krasniqi ka thënë se Kurti po e konsideron më të rëndësishme Haxhiun sesa Kuvendin e Kosovës./REL
