Shqipëria rezulton mes vendeve më të rrezikuara dhe vulnerabël në Evropë, së bashku me Bosnjen dhe Serbinë sa i përket sigurisë kibernetike.
Një renditje e përpiluar kohët e fundit nga kompania e sigurisë kompjuterike “Kloudle” nxori në pah se tre shtetet ballkanike janë vendet më të cenueshme në kontinent ndaj shkeljeve të sigurisë së cloud.
Analiza u krye midis 2019 dhe 2023 duke gjurmuar platforma dhe shërbime të ndryshme cloud në mbarë botën dhe jo vetëm të IBM.
Rezultati i rrezikut të shkeljes së sigurisë në renë kompjuterike
10 shtetet më të rrezikuara

Me një rezultat rreziku prej 71%, më e cenueshme nga të gjithë është Bosnja dhe Hercegovina. Në dy dekadat e fundit ka përjetuar afro nëntë milionë depërtime të sistemit “Cloud” dhe është vendi më i ekspozuar në krahasim me madhësinë e tij. Ai gjithashtu ka rezultatin më të ulët të gatishmërisë për sigurinë kibernetike.
Bosnja pasohet nga Serbia dhe Shqipëria, të cilat kanë një rezultat të përgjithshëm të rrezikut përkatësisht 69% dhe 67%. Megjithatë, Serbia dhe Shqipëria kishin nivele shumë më të larta gatishmërie, përkatësisht 72% dhe 71%.
Britania e Madhe dhe Italia nën sulm
Mbretëria e Bashkuar u rendit e katërta për sa i përket rreziqeve të përgjithshme për shkak të numrit të lartë të përllogaritjeve të thyerjeve të cloud në dy dekadat e fundit – mbi një miliard.
Italia është ekonomia tjetër e madhe evropiane ndër vendet më të rrezikuara, me rreth 800 milionë shkelje të vlerësuara.
Ekspozimi i sigurisë kibernetike kundrejt gatishmërisë për sigurinë kibernetike

Italia megjithatë mund të llogarisë në një nivel të lartë gatishmërie, për të cilën shënoi 88 nga 100.
“Dobësitë e ekspozuara në vende si Bosnja dhe Hercegovina dhe Serbia nxjerrin në pah boshllëqet kritike në infrastrukturën e sigurisë kibernetike që kanë nevojë për vëmendje të menjëhershme,” thotë CEO dhe themeluesi i Kloudle, Akash Mahajan.
“Ne duhet t’i japim përparësi edukimit për sigurinë kibernetike dhe të zbatojmë masa të forta për mbrojtjen e të dhënave ndërsa vazhdojmë të mbështetemi më shumë në teknologjitë cloud. Këto përfshijnë auditime të rregullta të sigurisë, programe trajnimi të punonjësve dhe miratimin e teknologjive të avancuara të enkriptimit.”/Euronews
