139 milion euro është shifra e investimeve te Kosovës në Shqipëri. Këtë ka njoftuar Kryeministri Edi Rama nga Prishtina në nisje të mbledhjes së përbashkët të dy qeverive. Rama tha se, investimet e Kosovës në Shqipëri ishin 9 milionë euro në vitin 2017.
“Kur ne kemi nisur punën më nga afër dhe më intensivisht me qeveritë e Kosovës kemi pasur një volum të shkëmbimeve tregtare 160 milionë euro. Vitin që lamë pas volumi i i shkëmbimeve tregtare është 433 milionë euro. Pra, kemi hyrë në zonën kur shifrat marrin një lloj serioziteti në krahasim me shifrën qesharake të 160 milionë euro”, tha Rama.
Kryeministri tha se “sot në Shqipëri rezultojnë të regjistruar 1225 subjekte biznesi nga Kosova, 1081 prej të cilave janë pronësi 100% e subjekteve nga Kosova, ndërkohë që 145 të tjera pronësi e përbashkët me partnerët në Shqipëri”.
Rama tha se fluksi i investimeve është në vlerën më të lartë historike ka qenë 16 milionë euro i 2018, ndërkohë që jemi në 41 milionë euro në vitin 2021, një indikator jashtëzakonisht i rëndësishëm.
Kryeministri shprehu besimin se të dy vendet kanë gjithë mundësinë të intensifikojmë dhe shtojnë volumin e investimeve reciprokisht.
