Komisioni i Veprimtarive Prodhuese në Kuvend ka rrëzuar sot nismën e deputetit Agron Duka për ndryshime në ligjin për bujqësinë. Gjatë diskutimeve në komision, zv/ministri Enio Civici theksoi se përmirësimi i aftësive konkurruese, menaxhimi i qëndrueshëm i pasurive natyrore dhe zhvillimi i barazpeshuar territorial i viseve rurale do të jenë objektivat afatgjatë të strategjisë dhe planit 2021-2027 për bujqësinë dhe zhvillimin rural.
Civici tha se, “MBZHR do të përmbyllë brenda dy muajve të ardhshëm, strategjinë 2021-2027 për bujqësinë dhe zhvillimin rural, duke reflektuar të gjitha ndryshimet që i përgjigjen zhvillimit të kohës dhe interesave të fermerëve dhe grupeve të interesit”.
Zv/Ministri shpjegoi se, me masat për zbatimin e politikave bujqësore dhe zhvillimin e zonave rurale synohet të arrihet; rritja e të ardhurave për popullsinë rurale, rritja e prodhimit, cilësia dhe siguria ushqimore, mbrojtja dhe ruajtja e mjedisit, duke garantuar që bujqësia të ruajë burimet natyrore dhe ulja e varfërisë, përmes gjenerimit të punësimit dhe popullimin e fshatrave.
Sipas tij, qeveria do të vijojë programin e pagesave të drejtpërdrejta për prodhuesit, për të arritur objektivat e politikës, kryesisht, për të rritur konkurrueshmërinë dhe për të mbështetur të ardhurat në fermë.“Vend të rëndësishëm zë edhe mbështetja për përmirësimin e konkurrueshmërisë së bujqësisë dhe të industrisë agroushqimore; mbështetja për menaxhimin e tokës dhe përmirësimin e mjedisit; arsimin dhe trajnimin për nevojat e bujqësisë dhe të zhvillimit rural”, deklaroi Civici.
Ekofin.al
