Korporata e Investimeve Shqiptare ka hapur një konkurs ndërkombëtar për përzgjedhjen e partnerit privat që do të financojë dhe zhvillojë Qendrën e Shërbimeve Publike në Palasë, ndërsa paralelisht do të ndërtojë dy struktura akomoduese në prona shtetërore në Palasë dhe Dhërmi.
Kriteri bazë financiar parashikon që Korporatës t’i ofrohet të paktën 35% e sipërfaqes totale të zhvillimit të secilës strukturë akomoduese. Sipërfaqja maksimale që mund të projektohet dhe ndërtohet është 3,577 metra katrorë në Palasë dhe 2,100 metra katrorë në Dhërmi.
Kandidatët do të renditen në varësi të përqindjes së sipërfaqes që i ofrojnë Korporatës mbi pragun minimal prej 35%. Sipas dokumenteve të thirrjes, fituesi duhet të ketë marrë çmimin e parë nga juria për masterplanin dhe projekt-idetë arkitekturore dhe njëkohësisht të ketë paraqitur ofertën financiare më të favorshme për Korporatën.
Shërbimet publike financohen nga zhvilluesi privat
Projekti parashikon ngritjen e Qendrës Shëndetësore Verore në Palasë, stacionit të Policisë së Shtetit, stacionit të Policisë Kufitare dhe shërbimit zjarrfikës për zonën Palasë-Dhërmi.
Këto objekte me funksion publik do të financohen dhe zhvillohen nga partneri privat i përzgjedhur, në kuadër të marrëveshjes për zhvillimin e dy strukturave akomoduese. Me kërkesë të Korporatës, objektet e para që do të ndërtohen duhet të jenë pikërisht ambientet e shërbimeve publike në Palasë.
Partneri privat do të mbulojë gjithashtu shpenzimet e konkursit ndërkombëtar, hartimin e projekteve të detajuara, taksat dhe tarifat për lejet e zhvillimit dhe të ndërtimit, mbikëqyrjen e punimeve, si dhe kostot e regjistrimit të objekteve dhe kalimit të pjesëve takuese te partneri publik dhe Korporata.
Konkursi zhvillohet në dy faza
Procedura do të zhvillohet në dy faza dhe me tri zarfe. Në fazën e parë, subjektet e interesuara duhet të paraqesin dokumentet e kualifikimit, një masterplan për zonën e zhvillimit publik në Palasë dhe tri projekt-ide paraprake arkitekturore.
Pesë kandidatët më të vlerësuar që plotësojnë kriteret e kualifikimit do të ftohen në fazën e dytë. Në këtë fazë, zarfi i parë do të përmbajë masterplanin dhe projekt-idetë arkitekturore, ndërsa zarfi i dytë ofertën financiare për dy strukturat akomoduese në Palasë dhe Dhërmi.
Projektet do të shqyrtohen nga një juri ndërkombëtare dhe pesë propozimeve më të mira do t’u jepen çmime. Pas vlerësimit arkitekturor do të hapen ofertat financiare për përzgjedhjen e fituesit të kontratës së sipërmarrjes.
Afati për dorëzimin e aplikimeve në fazën e parë është 10 shtator 2026, ora 15:00.
Procedura është e hapur për subjekte private ose publike, vendase dhe të huaja, të cilat mund të aplikojnë edhe me nënkontraktorë të specializuar. /ekofin.al
