Shqipëria është kthyer në një nga destinacionet më të preferuara të Evropës, falë ujërave të kristalta, peizazheve natyrore, çmimeve konkurruese dhe promovimit të saj në rrjetet sociale, shkruan media britanike “Telegraph”.
Vetëm pak vite më parë, vendi ishte një destinacion ende pak i njohur për turistët ndërkombëtarë, por vitet e fundit ka përjetuar një rritje të jashtëzakonshme të numrit të vizitorëve.
Plazhet e Rivierës Shqiptare, qytetet historike dhe bukuritë natyrore kanë tërhequr gjithnjë e më shumë udhëtarë nga e gjithë bota.
Numri i vizitorëve në Shqipëri vijon të rritet, ndërsa markat e mëdha ndërkombëtare të hotelerisë po zgjerojnë praninë e tyre përmes investimeve në struktura të reja turistike.
Hapja e shumëpritur e Aeroportit të Vlorës këtë verë pritet të krijojë një pikë të re hyrjeje për turistët dhe të lehtësojë aksesin drejt Rivierës Shqiptare.
Një ndër projektet më të përfolura në sektorin e turizmit janë dy resortet luksoze të planifikuara nga Ivanka Trump dhe bashkëshorti i saj Jared Kushner, të cilat kanë nxitur debat publik dhe reagime të ndryshme në Shqipëri.
Këto zhvillime kanë sjellë një pyetje të rëndësishme: Si mund të sigurohet një zhvillim i qëndrueshëm i turizmit shqiptar, duke ruajtur njëkohësisht vlerat natyrore dhe kulturore të vendit?
Transformimi i turizmit shqiptar
Saranda, një nga destinacionet më të njohura turistike të Shqipërisë, dikur kishte një pamje krejt tjetër.
Sipas Gillian Gloyer, autore e një udhëzuesi turistik për Shqipërinë, e cila ka jetuar në vend në fund të viteve ’90, qyteti ishte një port i qetë, ku ndërtesa më e lartë ishte hoteli shtatëkatësh Butrinti.
Në atë periudhë, turizmi ndërkombëtar ishte ende në nivele shumë të ulëta dhe vetëm disa zona bregdetare kishin filluar të krijonin shërbime për vizitorët.
Pas disa dekadash izolimi gjatë regjimit komunist, Shqipëria nisi të shfaqej gradualisht në hartën turistike ndërkombëtare.
Një moment i rëndësishëm ishte viti 2011, kur revista e njohur turistike “Lonely Planet” e renditi vendin si një nga destinacionet kryesore për t’u vizituar.
Rritja më e madhe e interesit për Shqipërinë erdhi pas pandemisë, e ndikuar nga shtimi i fluturimeve me kosto të ulët nga Tirana dhe promovimi i plazheve shqiptare në rrjetet sociale, veçanërisht në TikTok.
Në vitin 2025, numri i turistëve u rrit ndjeshëm krahasuar me vitin 2019, duke e pozicionuar Shqipërinë ndër destinacionet turistike me rritjen më të shpejtë në Evropë.
Në fillim, strategjia e zhvillimit turistik u përqendrua te promovimi i turizmit rural dhe mbështetja e banorëve të zonave të ndryshme për të kthyer shtëpitë e tyre në bujtina.
Megjithatë, vitet e fundit vëmendja është zhvendosur gjithnjë e më shumë drejt ndërtimit të hoteleve, resorteve dhe komplekseve të mëdha turistike përgjatë vijës bregdetare.
Qeveria shqiptare ka vendosur si objektiv, që vendi të presë rreth 30 milionë turistë në vit deri në vitin 2030, nga miliona vizitorë që mbërrijnë aktualisht çdo vit, duke synuar ta kthejë turizmin në një nga shtyllat kryesore të ekonomisë.
Shqipëria po synon të forcojë më tej pozicionin e saj si një destinacion kryesor evropian, duke kombinuar turizmin bregdetar me kulturën, historinë, gastronominë dhe natyrën.
Vitet e ardhshme pritet të jenë vendimtare për zhvillimin e turizmit shqiptar dhe për ta konsoliduar vendin si një nga destinacionet më interesante të Mesdheut./ATSH
