Miliarderi francez Xavier Niel pritet të bëhet aksioneri më i madh i Vodafone Group, pasi grupi i telekomunikacioneve nga Emiratet e Bashkuara Arabe e&, ra dakord të shesë të gjithë pjesën e tij në kompaninë britanike për afro 6 miliardë dollarë.
Marrëveshja i jep njërit prej investitorëve më aktivë në sektorin europian të telekomunikacioneve, i cili prej kohësh ka mbështetur konsolidimin e kësaj industrie të fragmentuar, pjesën më të madhe të aksioneve në operatorin më të madh celular të Britanisë.
Niel, 58 vjeç, iu drejtua drejtpërdrejt kompanisë e&, pasi vlerësoi se kishte një mundësi për të krijuar një pozicion të rëndësishëm në Vodafone me një çmim tërheqës. Sipas një burimi në dijeni të çështjes, marrëveshja u arrit brenda pak ditësh.
Ndërkohë, e& kishte kërkuar të tërhiqej nga investimet e lidhura me zgjerimin përtej aktivitetit të saj kryesor në telekomunikacione, të cilat kishin rënduar rritjen e fitimeve, bëri të ditur një burim i dytë.
Pritshmëri për shkurtime të mëtejshme të kostove
Disa analistë presin që Niel të kërkojë ndikim më të madh mbi strategjinë e Vodafone.
“Ne besojmë se strategjia e zakonshme e Xavier Niel është të blejë dhe të mbajë aksionet, të përpiqet të ushtrojë ndikim mbi kompaninë dhe, potencialisht, të kalojë drejt kontrollit të plotë me kalimin e kohës”, tha NewStreet Research në një analizë.
Analistët e Berenberg vlerësuan se investimi i Niel mund të përshpejtojë uljen e kostove dhe rritjen e fluksit të lirë të parasë në Vodafone. Ata iu referuan vlerës që kompania e tij Iliad ka krijuar në operatorin suedez Tele2, që prej blerjes së një pjesëmarrjeje fillestare prej 20% në vitin 2024.
Një zëdhënës i Vega, mjeti i investimit në pronësi të grupit të familjes Niel, tha se transaksioni përbën një blerje të drejtpërdrejtë të aksioneve të e& dhe nuk përfshin marrëveshje për përfaqësim apo drejtim në kompaninë Vodafone.
Sipas tij, fokusi i menjëhershëm është sigurimi i miratimeve të nevojshme rregullatore, përfshirë autorizimet që lidhen me investimet e huaja.
Vega bëri të ditur se kishte nënshkruar një marrëveshje detyruese për blerjen e rreth 16.2% të aksioneve për afërsisht 4.4 miliardë paund, ose 5.91 miliardë dollarë. Çmimi është 13% më i lartë se vlera me të cilën aksionet e Vodafone mbyllën tregtimin të enjten.
Vodafone ka kaluar nëpër një ristrukturim të rëndësishëm nën drejtimin e shefes ekzekutive Margherita Della Valle, e cila mori detyrën në vitin 2023.
Grupi është tërhequr nga Spanja dhe Italia, ka përqendruar aktivitetin në Gjermani, Britani dhe Afrikë dhe ka përfunduar bashkimin me Three UK, duke krijuar operatorin më të madh celular në Britani.
“Vodafone përbën një mundësi bindëse investimi, të mbështetur nga asete cilësore, marka të fuqishme, pozicione drejtuese në treg dhe një prani të diversifikuar gjeografike”, tha Niel në një deklaratë.
“Si një kompani më e thjeshtë dhe më e fokusuar, Vodafone është gati për një fazë të re rritjeje dhe ndodhet në një pozicion të favorshëm për të çliruar një vlerë të konsiderueshme, ende të pashfrytëzuar, në aktivitetet e saj në Europë dhe Afrikë.”
Aksionet e Vodafone u rritën me 12%, ndërsa aksionet e e& u rritën me rreth 4.5% pas njoftimit të transaksionit.
Analisti i CCS Insight, Kester Mann, tha se vendimi përfaqësonte një kthesë të papritur për e&, e njohur më parë si Etisalat. Kompania kishte blerë fillimisht 9.8% të aksioneve të Vodafone në vitin 2022 për 4.4 miliardë dollarë dhe më pas e kishte rritur gradualisht pjesëmarrjen.
“Njoftimi tregon se kompania nga Lindja e Mesme po tërhiqet nga strategjia për t’u shndërruar në një aktor global të telekomunikacioneve dhe teknologjisë dhe tani dëshiron të përqendrohet te aktivitetet e saj kryesore.”
Vodafone e mirëpriti ardhjen e Niel si aksioneri më i madh i kompanisë.
“Ne e njohim mirë grupin e familjes Niel dhe presim të bashkëpunojmë me të si një aksioner mbështetës dhe afatgjatë”, tha Vodafone në një deklaratë.
Niel bleu për herë të parë 2.5% të aksioneve të Vodafone në vitin 2022, nëpërmjet një strukture tjetër investimi, por kjo pjesëmarrje është shitur ndërkohë, sipas një zëdhënësi të Vega.
Ai ka tentuar gjithashtu dy herë gjatë viteve të fundit të blejë aktivitetin italian të Vodafone, por të dyja ofertat janë refuzuar.
Miliarderi është shndërruar në një prej aktorëve kryesorë të sektorit europian të telekomunikacioneve, duke e zgjeruar Iliad nga një operator sfidues në tregun francez në një grup me prani në Francë, Itali dhe Poloni.
Niel është manjati i dytë francez në po aq vite që synon një kompani të madhe britanike të telekomunikacioneve. Grupi Altice i Patrick Drahi bleu afro 25% të BT, përpara se t’ia shiste pjesëmarrjen Bharti Global dy vjet më parë, me qëllim uljen e borxhit. /Përshtati nga Reuters, ekofin.al
