Banka Evropiane për Rindërtim dhe Zhvillim (BERZH) ka emëruar Hannes Takacs si drejtuesin e ri të zyrës së saj në Shqipëri. Ai do të marrë detyrën më 1 shtator 2026 dhe do të jetë i vendosur në Tiranë.
Takacs zëvendëson Ekaterina Solovovën, e cila ka drejtuar zyrën e BERZH në Shqipëri gjatë pesë viteve të fundit. Duke nisur nga 1 shtatori, Solovova do të marrë drejtimin e zyrës së BERZH në Mal të Zi.
Hannes Takacs iu bashkua BERZH-it në vitin 2014, pas më shumë se dy dekadash përvojë ndërkombëtare në financat korporative, tregjet e kapitalit dhe bankingun e investimeve. Para se të bëhej pjesë e bankës, ai ishte Drejtor Menaxhues i CAPMEX, një kompani konsulence në tregjet e kapitalit dhe financat korporative që operon në mbi 50 vende të botës.
Në BERZH, ai fillimisht punoi në ekipin për Zhvillimin e Monedhës Vendase dhe Tregjeve të Kapitalit në Londër, ku drejtoi projekte për zhvillimin e tregjeve të aksioneve dhe kapitalit në rajone të ndryshme.
Në vitin 2020, Takacs u emërua drejtues i BERZH për Mongolinë, ku mbikëqyri një periudhë zgjerimi të konsiderueshëm të aktivitetit të bankës në atë vend.
Së fundmi, ai ka shërbyer si këshilltar i Zëvendëspresidentit të Parë të BERZH, Greg Guyett.
Emërimi i Takacs vjen në një periudhë kur BERZH mbetet një nga institucionet financiare ndërkombëtare më aktive në Shqipëri, duke financuar projekte strategjike në energji, infrastrukturë, sektorin privat, sistemin financiar dhe tranzicionin e gjelbër.
