Me një rritje prej 19.7% të numrit të vizitorëve të akomoduar në strukturat turistike gjatë muajit prill, sektori i turizmit vijon të japë sinjale të forta zgjerimi, duke konfirmuar se Shqipëria po hyn në sezonin veror me një kërkesë në rritje si nga tregu vendas, ashtu edhe nga turistët e huaj.
Të dhënat e publikuara nga INSTAT tregojnë se gjatë prillit 2026 numri i vizitorëve që qëndruan në hotele dhe struktura të tjera akomoduese u rrit ndjeshëm krahasuar me të njëjtën periudhë të vitit të kaluar. Rritja është mbështetur kryesisht nga turistët e huaj, të cilët shënuan një zgjerim prej 22.6%, ndërsa vizitorët rezidentë u rritën me 12.9%.
Shifrat konfirmojnë se interesi ndërkombëtar për Shqipërinë vijon të forcohet, ndërsa vendi po konsolidohet gjithnjë e më shumë si një destinacion turistik që tërheq vizitorë jo vetëm gjatë sezonit të verës, por edhe në muajt e pranverës.
Pozitive paraqitet edhe ecuria e netqëndrimeve, një tregues që mat kohëzgjatjen e qëndrimit të turistëve në vend. Në total, netqëndrimet u rritën me 5.6%, me vizitorët e huaj që shënuan një rritje prej 6.3% dhe ata rezidentë 3.9%.
Megjithatë, krahasuar me ritmin e rritjes së numrit të turistëve, zgjerimi më i moderuar i netqëndrimeve tregon se Shqipëria po tërheq më shumë vizitorë, por jo domosdoshmërisht për periudha më të gjata. Ky mbetet një nga sfidat kryesore të industrisë turistike, e cila synon të rrisë jo vetëm numrin e turistëve, por edhe kohën e qëndrimit dhe shpenzimet e tyre në ekonomi.
Italia mbetet tregu kryesor burimor për turizmin shqiptar. Sipas INSTAT, 23% e të gjithë vizitorëve jo-rezidentë të akomoduar gjatë prillit ishin italianë. Kosova renditet e dyta me 13% të totalit, ndërsa Mbretëria e Bashkuar dhe Gjermania përfaqësojnë secila nga 8% të turistëve të huaj. Franca kontribuon me 6%, ndërsa pjesa tjetër, rreth 42%, vjen nga vende të ndryshme të Europës dhe më gjerë.
Një nga zhvillimet më domethënëse të këtij sezoni është zgjerimi i hartës turistike përtej destinacioneve tradicionale. Rajoni i Veriut regjistroi rritjen më të fortë të vizitorëve të huaj, duke kaluar nga 26,656 turistë në prill 2025 në 48,044 turistë këtë vit. Ky zhvillim konfirmon potencialin në rritje të Alpeve Shqiptare dhe destinacioneve malore, të cilat po tërheqin gjithnjë e më shumë turistë të huaj.
Megjithatë, rajoni Qendër vazhdon të mbetet epiqendra e turizmit shqiptar. Gjatë muajit prill ai priti 101,481 vizitorë jo-rezidentë, numri më i lartë në rang kombëtar, i mbështetur nga pesha që kanë Tirana, Durrësi dhe infrastruktura më e zhvilluar turistike.
Interesi i turistëve nuk është përqendruar vetëm në vijën bregdetare. Të dhënat tregojnë se në zonat jo-bregdetare u akomoduan 96,992 vizitorë të huaj, më shumë se në zonat bregdetare ku u regjistruan 86,462 turistë. Ky trend tregon se oferta turistike shqiptare po diversifikohet dhe se turizmi kulturor, historik dhe natyror po fiton terren krahas modelit tradicional të detit.
Hotelet dhe strukturat e ngjashme vijojnë të mbajnë peshën kryesore të tregut. Gjatë muajit prill ato akomoduan 239,081 vizitorë, kundrejt 198,127 të regjistruar një vit më parë, duke reflektuar rritjen e kërkesës për shërbime turistike të organizuara.
Megjithatë, pavarësisht rritjes së numrit të turistëve, norma e shfrytëzimit të dhomave në hotele mbeti në nivelin 22.4%, e pandryshuar krahasuar me prillin e vitit 2025. Kjo tregon se kapacitetet akomoduese po zgjerohen paralelisht me rritjen e kërkesës, duke shmangur presionin e menjëhershëm mbi ofertën.
Shifrat e prillit konfirmojnë se turizmi mbetet një nga sektorët më dinamikë të ekonomisë shqiptare. Megjithatë, sfida e radhës për industrinë nuk është vetëm të tërheqë më shumë turistë, por t’i mbajë ata më gjatë në vend dhe të rrisë vlerën ekonomike që secili vizitor lë në tregun shqiptar./ekofin.al
