Të ardhurat e veta vendore në vitin 2025 tregojnë diferenca të mëdha mes bashkive, si në vlerën totale të arkëtimeve, ashtu edhe në të ardhurat për banor. Sipas të dhënave të financave vendore, 39 bashki kanë regjistruar rritje të të ardhurave të veta krahasuar me vitin 2024, ndërsa 22 bashki, ose 36% e totalit të bashkive të vendit, kanë shënuar rënie.
Rritjen më të madhe në vlerë absolute e ka regjistruar Bashkia Himarë, me rreth 2.3 miliardë lekë më shumë të ardhura krahasuar me vitin 2024. Pas saj renditet Bashkia Vlorë, me rreth 2 miliardë lekë më shumë, dhe Bashkia Kamzë, me rreth 1.5 miliardë lekë më shumë. Këto bashki rezultojnë ndër përfitueset kryesore të rritjes së të ardhurave vendore gjatë vitit 2025.
Në anën tjetër, rënien më të madhe e ka shënuar Bashkia Tiranë, e cila ka mbledhur rreth 8.2 miliardë lekë më pak të ardhura të veta, ose 32% më pak krahasuar me vitin 2024. Megjithatë, Tirana mbetet kontribuesja kryesore në nivel kombëtar, me rreth 17.6 miliardë lekë të ardhura të veta, ose 39.2% të totalit të të ardhurave të pushtetit vendor.
Pas Tiranës, rënie të fortë kanë regjistruar Bashkia Krujë dhe Bashkia Patos. Kruja ka pasur rënie me rreth 29%, ose 132 milionë lekë më pak, ndërsa Patosi ka shënuar rënie me rreth 28%, ose 56 milionë lekë më pak krahasuar me një vit më parë.
Diferencat bëhen edhe më të dukshme kur të ardhurat llogariten për banor. Në vitin 2025, pushteti vendor ka mbledhur mesatarisht 10,788 lekë për banor, ose rreth 3,636 lekë më shumë se në vitin 2024, me një rritje prej 50.8%.
Bashkia Himarë kryeson ndjeshëm në nivel kombëtar për të ardhurat e veta për banor, me rreth 212,042 lekë për banor. Pas saj renditet Bashkia Kamëz, me rreth 35,047 lekë për banor, dhe Bashkia Kavajë, me rreth 31,294 lekë për banor.
Në skajin tjetër të renditjes janë bashkitë me nivelin më të ulët të të ardhurave të veta për banor. Bashkia Këlcyrë ka mbledhur vetëm rreth 1,125 lekë për banor, ndërsa Bashkia Has rreth 1,271 lekë për banor, duke treguar diferenca të theksuara territoriale në kapacitetin fiskal vendor.
Në total, 37 bashki kanë pasur rritje të të ardhurave për banor gjatë vitit 2025. Rritjen më të madhe e ka regjistruar Bashkia Himarë, me 169,075 lekë më shumë për banor, e ndjekur nga Bashkia Vlorë me 16,605 lekë më shumë dhe Bashkia Kamëz me 13,559 lekë më shumë për banor.
Nga ana tjetër, 24 bashki kanë shënuar rënie të të ardhurave për banor krahasuar me vitin 2024. Rënien më të madhe e ka pasur Bashkia Tiranë, me rreth 11,877 lekë më pak për banor, e ndjekur nga Bashkia Patos me 2,222 lekë më pak dhe Bashkia Krujë me 2,158 lekë më pak.
Të dhënat tregojnë se, pavarësisht rritjes së përgjithshme të të ardhurave vendore, kapaciteti financiar i bashkive mbetet shumë i pabarabartë. Bashkitë me aktivitet më të lartë ekonomik, turistik apo ndërtimor arrijnë të mbledhin ndjeshëm më shumë të ardhura, ndërsa bashkitë më të vogla dhe me bazë më të kufizuar fiskale mbeten shumë pas. /ekofin.al
