Shqiptarët po përdorin gjithnjë e më shumë internet më të shpejtë në shtëpi, ndërsa operatorët po largohen gradualisht nga teknologjitë e vjetra me kabllo bakri dhe DSL drejt rrjeteve me fibër optike. Të dhënat e raportit vjetor 2025 të AKEP, të siguruara nga ekofin.al, tregojnë një transformim të dukshëm të internetit fiks në vend, ku lidhjet me shpejtësi të lartë po bëhen standardi i ri për familjet dhe bizneset shqiptare.
Sipas raportit, në fund të vitit 2025 rreth 89% e abonentëve të internetit broadband fiks kishin akses në lidhje me shpejtësi mbi 30 Mbps, nga rreth 84% një vit më parë. Rritja është edhe më e fortë për internetin me shpejtësi mbi 100 Mbps. Numri i abonentëve në këtë kategori arriti në 387,184, ose rreth 54% e totalit të abonentëve, nga vetëm 42% që ishte në vitin 2024.
AKEP vlerëson se kjo rritje lidhet me kalimin e operatorëve drejt teknologjive FTTH/FTTB, pra internetit me fibër optike deri në banesë ose ndërtesë, që ofron shpejtësi dhe cilësi shumë më të lartë krahasuar me lidhjet tradicionale DSL. Ky ndryshim po ndikon drejtpërdrejt në mënyrën se si qytetarët përdorin shërbimet online, nga puna dhe arsimi në distancë deri te bankingu, shërbimet publike dhe argëtimi digjital.
Raporti tregon se teknologjia dominuese për internetin fiks në Shqipëri tashmë është fibra optike FTTH/FTTB, e cila zë rreth 75% të të gjitha lidhjeve broadband fikse në vend. Pas saj renditet interneti përmes modemëve kabllorë koaksialë me rreth 13%, ndërsa pjesa tjetër ndahet mes teknologjive të përziera, bakrit dhe DSL-së tradicionale. Vetëm 2% e lidhjeve vijojnë të ofrohen përmes DSL-FTTN/FTTC dhe 2% përmes teknologjisë Gfast.
Edhe mënyra se si shpërndahen shpejtësitë e internetit ka ndryshuar ndjeshëm gjatë viteve të fundit. Në vitin 2021, pjesa më e madhe e abonentëve kishte lidhje me shpejtësi nga 10 deri në 30 Mbps, ndërsa në vitin 2025 pesha kryesore është zhvendosur drejt lidhjeve mbi 100 Mbps. Sipas grafikëve të AKEP, në vitin 2025 rreth 49% e abonentëve kishin internet me shpejtësi nga 100 Mbps deri në më pak se 1 Gbps, ndërsa 36% kishin lidhje nga 30 Mbps deri në më pak se 100 Mbps. Vetëm 11% mbeteshin në kategorinë 10–30 Mbps.
Rritja e përdorimit të internetit të shpejtë po reflektohet edhe te trafiku i të dhënave. Gjatë vitit 2025, trafiku broadband nga rrjetet fikse arriti në rreth 2.08 miliardë GB, ose 17% më shumë krahasuar me vitin 2024. Sipas AKEP, kjo tregon se qytetarët po përdorin gjithnjë e më shumë internetin për shërbime financiare, informuese, sociale, shëndetësore dhe komunikim të përditshëm.
Raporti e lidh këtë zhvillim edhe me objektivat kombëtare për ndërtimin e një infrastrukture broadband me shpejtësi të lartë në të gjithë vendin, me synimin për të krijuar bazat e një “shoqërie Gigabit”. Kjo do të thotë më shumë familje me akses në internet të qëndrueshëm dhe më të shpejtë, por edhe një varësi gjithnjë e më e madhe e jetës së përditshme nga infrastruktura digjitale. /ekofin.al
