Merita Bejtja pritet të votohet nga Kuvendi i Shqipërisë për një mandat të tretë në pozicionin e Inspektorit të Përgjithshëm të Bankës së Shqipërisë.
Ekofin.al mëson se pas një periudhe “qetësie”, kur u vu në diskutim madje edhe rihapja e procedurës, kandidatura e vetme e znj. Bejtja do t’i përcillet seancës për t’u votuar që këtë javë.
Inspektorja e Përgjithshme në detyrë doli para Komisionit të Ekonomisë për të paraqitur platformën e saj në fillim të shkurtit dhe që atëherë nuk pati më asnjë veprim, pasi do duhej që kandidatura e saj të merrte mbështetjen e të paktën 28 deputetëve që t’i përcillej seancës.
Aktualisht, ajo e ka fituar këtë mbështetje dhe pritet të votohet në seancën e 7 majit.
Merita Bejtja që nga prilli i vitit 2015 ka mbajtur pozicionin e Inspektorit të Përgjithshëm të Bankës së Shqipërisë. Znj. Bejtja ka një pěrvojë profesionale që nga viti 1993 në sistemin bankar, fillimisht në Bankën e Kursimeve dhe më pas në Bankën Kombětare Tregtare dhe Raiffeisen Bank, në funksione drejtuese, duke u bërë dhe Drejtore Ekzekutive e Raiffeisen Leasing.
Referuar ligjit organik për BSH, Inspektori i përgjithshëm drejton Departamentin e Kontrollit të Bankës së Shqipërisë, si edhe propozon inspektorët e këtij departamenti. Së bashku me ta kanë për detyrë:
a) të ushtrojnë kontroll kontabël të brëndshëm, si dhe të kryejnë kontrolle të brëndshme periodike për administrimin dhe operacionet e Bankës së Shqipërisë, me qëllim që të sigurojnë mbarëvajtjen e zbatimit të ligjeve dhe të akteve nënligjore në Bankën e Shqipërisë;
b) të kontrollojnë dhe t’i paraqesin Këshillit Mbikëqyrës raporte e rekomandime për llogaritë dhe regjistrat, si dhe për procedurat buxhetore, kontabël dhe kontrollet e Bankës së Shqipërisë;
c) të kontrollojnë raportet periodike financiare dhe dokumentet e lidhura me to të Bankës së Shqipërisë dhe, në qoftë se janë përgatitur në mënyrën e duhur, të nxjerrin certifikatë për këtë qëllim. /ekofin.al
Artikull i Ekofin.al
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Artikulli mund të ripublikohet nga mediat e tjera vetëm duke
cituar “Ekofin.al”, shoqëruar me linkun e artikullit origjinal.
