Rënia e lindjeve në vend po reflektohet gjithnjë e më qartë edhe në uljen e pagesave sipas skemave të mbështetjes financiare për familjet.
Sipas të dhënave të Shërbimit Social Shtetëror për bonusin e bebes, në vitin 2025 është regjistruar një rënie e ndjeshme si në numrin e çeqeve të shpërndara, ashtu edhe në fondin total të përdorur për këtë program. Gjatë vitit 2025 rezultojnë 4,671 çeqe me një fond prej 1,482,355,000 lekësh, ndërsa në vitin 2024 ishin 6,565 çeqe me fond 2,200,000,000 lekë. Kjo do të thotë se brenda një viti janë shpërndarë 1,894 çeqe më pak ose 28.9% më pak bonuse, ndërsa fondi është ulur me 717,645,000 lekë, ose 32.6% më pak, duke reflektuar një tkurrje të konsiderueshme të përfituesve të këtij bonusi.
Ndërkohë, qeveria ka deklaruar se synon ta ndryshojë formulën e përfitimeve nga kjo skemë. Por, edhe pse është prezantuar publikisht si një ndryshim i rëndësishëm në politikat e mbështetjes së familjes dhe lindshmërisë, skema e re e bonusit të bebes nuk është miratuar ende dhe nuk ka nisur të zbatohet. Nisma është bërë e njohur gjatë fushatës elektorale të vitit 2025, kur Kryeministri Edi Rama deklaroi më 7 maj se, duke nisur nga viti i ardhshëm, mbështetja financiare për nënat dhe familjet nuk do të ishte më një pagesë e vetme në maternitet, por një ndihmë mujore e shpërndarë në vite, në varësi të numrit të fëmijëve.
Pas gjashtë vitesh zbatimi të skemës aktuale të bonusit të bebes, e cila parashikon dhënien e një çeku të menjëhershëm pas lindjes, qeveria ka prezantuar konceptin e një skeme të re, që synon të shtrijë mbështetjen financiare nga momenti i lindjes deri në moshën 5-vjeçare të fëmijës. Megjithatë, deri në këtë fazë, ndryshimi mbetet vetëm në nivel deklarativ dhe nuk është shoqëruar me një vendim të miratuar.
Mbështetja e re financiare, e parashikuar të niste nga 1 janari 2026, do të ofrohej në formën e pagesave mujore, të diferencuara sipas numrit të fëmijëve në familje. Për fëmijën e parë, pagesa mujore do të ishte 5 mijë lekë, për të dytin 7 mijë lekë dhe për të tretin e në vijim 10 mijë lekë, deri në moshën 5 vjeçare. Në total, kjo do të përkthehej në një mbështetje shumë më të lartë krahasuar me skemën aktuale, e cila ofron një pagesë të vetme në momentin e lindjes.
Megjithatë, deri më tani, nuk ka një vendim zyrtar të Këshillit të Ministrave. Po ashtu, nuk ka një dokument publik që të sqarojë kriteret e përfitimit, mënyrën e aplikimit, burimin e financimit apo ndikimin e saj në buxhetin e shtetit./ekofin.al
