Inspektorati i Punës shton inspektimet në janar, mbi 12 mijë vende pune të verifikuara, vendosen 445 gjoba

Mbi 12 mijë vende pune janë vendosur nën kontroll gjatë muajit janar, në kuadër të masave për formalizimin e tregut të punës dhe garantimin e të drejtave të punëmarrësve.

Sipas të dhënave zyrtare Inspektoratit Shtetëror të Punës dhe Shërbimeve Shtetërore, gjatë kësaj periudhe janë inspektuar 667 subjekte në të gjithë vendin, ndërsa janë vendosur 445 masa administrative për shkelje të konstatuara.

Po ashtu, janë trajtuar 90 ankesa të paraqitura nga qytetarë dhe punonjës.

Inspektimet në terren gjatë vitit 2025 kanë shënuar një intensifikim të ndjeshëm. Në total, janë inspektuar 9,532 subjekte në rang vendi, nga të cilat 8,086 kontrolle janë kryer mbi bazë risku, ndërsa 963 inspektime janë realizuar pas ankesave të depozituara nga qytetarët dhe punonjësit.

Nga kontrollet e ushtruara janë regjistruar 1,269 pezullime aktiviteti, 4,191 paralajmërime dhe 268 gjoba, në rastet kur janë evidentuar shkelje të legjislacionit në fuqi. Shkeljet e konstatuara lidhen kryesisht me formalizimin e marrëdhënieve të punës, mosrespektimin e kontratave, si dhe me sigurinë dhe shëndetin në punë.

Rezultatet e deritanishme për vitin 2025 tregojnë progres të ndjeshëm në luftën kundër informalitetit. Sipas autoriteteve, 98% e punëmarrësve të identifikuar si informalë janë formalizuar, ndërsa 2,538 punonjës të rinj janë deklaruar në skemën e sigurimeve shoqërore dhe shëndetësore.

Si pasojë e këtij procesi, të ardhurat në buxhet nga kontributet e sigurimeve janë rritur me rreth 28.3 milionë lekë në muaj, duke reflektuar ndikimin e drejtpërdrejtë të masave të ndërmarra.

Institucionet përgjegjëse theksojnë se kontrollet do të vijojnë me të njëjtin intensitet përgjatë gjithë vitit, me synim forcimin e ligjshmërisë, rritjen e standardeve në vendin e punës dhe garantimin e sigurisë për çdo punëmarrës.