Tirana International Airport (TIA) vijon të zgjerojë rolin e tij si një nyjë kyçe lidhëse mes Shqipërisë dhe destinacioneve ndërkombëtare, duke kontribuar jo vetëm në lehtësimin e lëvizjes së pasagjerëve, por edhe në forcimin e pozitës së Shqipërisë si një destinacion turistik në rritje. Sot, TIA mirëpriti fluturimin e parë të kompanisë ajrore “Jordan Aviation” nga Amani, duke shënuar hapjen e një linje të re ajrore mes Jordanisë dhe Shqipërisë.
Kjo lidhje direkte krijon një urë të re udhëtimi për qytetarët shqiptarë që dëshirojnë të eksplorojnë Jordaninë dhe Lindjen e Mesme, ndërsa njëkohësisht i ofron turistëve jordanezë mundësinë për të zbuluar bukuritë natyrore, trashëgiminë kulturore dhe mikpritjen tradicionale shqiptare. Nisja e kësaj linje reflekton përkushtimin e TIA-s dhe institucioneve partnere për të zgjeruar hartën ndërkombëtare të udhëtimeve nga dhe drejt Shqipërisë.
“Kjo linjë është rezultat i një bashkëpunimi të ngushtë dhe përkushtimi të vazhdueshëm nga ekipet e Aeroportit Ndërkombëtar të Tiranës dhe Jordan Aviation,” – u shpreh Piervittorio Farabbi, Drejtor Operacional i Aeroportit Ndërkombëtar të Tiranës. “Ajo i përgjigjet kërkesës në rritje për tregje të reja dhe forcon rolin e TIA-s si një urë lidhëse mes Evropës dhe Lindjes së Mesme.”
Hamzeh Alkhashman, zëvendës CFO i Jordan Aviation, shtoi: “Hapja e fluturimeve drejt Tiranës është një zhvillim me rëndësi për kompaninë tonë. Shqipëria po kthehet gjithnjë e më shumë në një zgjedhje të preferuar për udhëtarët jordanezë, dhe ne besojmë se kjo linjë do të japë rezultate pozitive për të dy vendet.”
Gjatë vitit 2025, TIA ka qenë dëshmitar i një serie zgjerimesh të ndjeshme në rrjetin ajror. Kompani të njohura ndërkombëtare kanë nisur ose njoftuar linja të reja direkte, duke përfshirë destinacione si Lisbonë (easyJet), Barcelonë (Vueling), Gjenevë (Air Albania), Riga, Tallinn dhe Vilnius (airBaltic), Tel Aviv (Sundor), Varshavë dhe Lamezia (Ryanair). Këto linja jo vetëm rrisin larmishmërinë e destinacioneve për pasagjerët shqiptarë, por e pozicionojnë më fort Shqipërinë në hartën turistike dhe ekonomike të Europës.
Gjithashtu, në tetor 2025, kompania Wizz Air do të nisë operimin e tre linjave të reja direkte nga Tirana drejt Malagës (Spanjë), Larnakës (Qipro) dhe Maltës, duke e çuar në 53 numrin total të destinacioneve që ofron kjo kompani nga TIA. Ky zhvillim përkon me përvjetorin e pestë të operimit të Wizz Air në Shqipëri dhe përforcon angazhimin e saj për të mbështetur rritjen e aksesueshmërisë ndërkombëtare të vendit tonë. /ekofin.al
