Kryeministri Edi Rama deklaroi sot se qeveria do të ndërhyjë brenda këtij viti në sektorin e naftës, duke u bërë pjesë aktive dhe faktor i rëndësishëm në këtë treg.
Në fjalën përmbyllëse pas Ditës së Parë të Dialogut për Bujqësinë dhe Zhvillimin Rural, një platformë komunikimi mes fermerëve dhe sipërmarrësve në funksion të procesit të anëtarësimit të Shqipërisë në BE deri në vitin 2030, Rama theksoi se mbështetja për sektorin bujqësor duhet të kalojë në një fazë të re, duke përfshirë edhe ndërhyrjen në sektorin e karburanteve.
“Problemi i naftës u ngrit përsëri. Unë mendoj që ne na duhet ta rishikojmë skemën e mbështetjes së naftës. Ne po përgatitemi të ndërhymë në sektorin e naftës. Në kuptimin që thashë më parë, qeveria do të jetë shumë aktive në krijimin e kushteve dhe në krijimin e skemave të bashkëpunimit me sipërmarrjen dhe të bashkëpunimit me faktorët ekonomikë për të rritur të ardhurat, jo të ardhurat e veta, por të njerëzve. Ne na duhet me patjetër të ndërtojmë një proces të ri, që po e përgatitim, ku qeveria do të jetë pjesë e forcave në sektorin e naftës. Që do të thotë, që ne duam të ndërhyjmë për të vendosur një ekuilibër të ri çmimi për konsumatorët.”
Rama nënvizoi se qeveria e ka studiuar për një kohë të gjatë këtë model dhe është e gatshme ta zbatojë brenda vitit.
“Kjo është diçka që e kemi studiuar për një kohë të gjatë dhe që është e mundshme dhe e bëshme, brenda këtij viti do të jemi pjesë si qeveri në importin e naftës dhe shpërndarjen e naftës, në bashkëpunim me aktorët e tjerë, që do t’ua bëjmë jetën më të lehtë, pasi do kenë qeverinë si garante dhe të importit, dhe të furnizimit me naftë. Kjo na vë në pozitë për të mundësuar një çmim më të arsyeshëm se çmimi i naftës aktualisht në Shqipëri, i cili patjetër në strukturë ka edhe taksën e qarkullimit etj.”.
Ai shtoi se përfshirja e qeverisë si aktor në tregun e naftës do të sjellë ndryshim edhe në politikën e karburanteve për sektorin bujqësor, duke e ndërtuar mbi një qasje të re.
“Tani ka ardhur koha që të veprojmë në një mënyrë tjetër dhe besoj që do të jetë një e mirë shumë e madhe, pasi duke marrë pjesë qeveria si një nga aktorët, edhe politika e naftës për sektorin bujqësor do të jetë e ndërtuar ndryshe, jo më me këtë qasje.”
