Shqiptarët kanë vërshuar masivisht jashtë vendit në vitin 2024 dhe kryesisht për pushime. Muajt e verës, si edhe dhjetori kanë patur edhe flukset më të larta të udhëtimeve.
Sipas të dhënave të publikuara nga Instat, në vitin 2024, numri i udhëtimeve për qëllime personale apo biznesi (brenda apo jashtë Shqipërisë), të kryera nga individët banues në Shqipëri të moshës mbi 15 vjeç ishte 4.426.074. Udhëtimet për qëllime personale përbëjnë 97,9 % të udhëtimeve gjithsej, ndërsa udhëtimet për qëllime biznesi 2,1 % të tyre.
Muajt me numrin më të lartë të udhëtimeve janë gushti, me 13,9 %, dhjetori me 13,7 %, korriku me 11,5 % dhe qershori me 9,4 %.
Në Shqipëri janë shënuar 3 milionë udhëtime për qëllime personale, ndërsa për qëllime biznesi 0,05 milionë.
“Pushime dhe kohë e lirë” përbën qëllimin më kryesor të udhëtimeve të kryera si në Shqipëri (54,1%) ashtu dhe jashtë saj (47,2%).
Udhëtimet e kryera jashtë Shqipërisë, kanë shënuar një rritje të konsiderueshme me 43,4%, krahasuar me vitin 2023.
Në vitin 2024, akomodimi në “Hotel” shënon një rritje me rreth 8,4%, krahasuar me udhëtimet e kryera në vitin 2023. Rritja më e lartë është regjistruar në transportin ajror me rreth 8,8%.
Numri mesatar i netëve të qëndrimit për udhëtime të kryera (në Shqipëri dhe jashtë saj) është 4,2 netë. Vlerat më të larta të shumës së netëve të qëndrimit (në milionë) janë regjistruar në muajt Gusht, Korrik, Dhjetor dhe Qershor. Në 2024, udhëtimet e kryera brenda dhe jashtë Shqipërisë për “Pushime dhe kohë e lirë” zënë peshën më të madhe, ndjekur nga udhëtimet e kryera jashtë Shqipërisë për qëllime “Vizita te të afërm dhe miq”.
Në vitin 2024, destinacionet më të preferuara për udhëtime për qëllime personale apo biznesi në Shqipëri janë qarqet: Tiranë (15,4 %), Vlorë (12,3 %), Korçë (10,9 %), Durrës (8,6 %) dhe jashtë saj Itali (8,6 %) Greqi (7,4 %), Gjermani (3,8 %) dhe shtete të tjera. /ekofin.al
