Kryeministri Edi Rama deklaroi se “mesatarja e pagës kur morëm detyrën ishte 322 euro, sot është 848 euro”.
Gjatë një bashkëbisedimi sot me pedagogë dhe studentë të Universitetit të Vlorës, Rama tha se “kemi rritjen e pagës minimale, jemi në 400 euro dhe praktikisht me 400 eurot jemi në vendin e tretë në rajon”.
“Janarin e vitit të ardhshëm do të shkojmë 500 euro pagën minimale”, tha Rama.
Kreu i qeverisë u shpreh se “projeksioni ynë për Shqipërinë 2030 është: të mos ketë pagë minimale nën 650 euro”.
Më tej Rama foli për inflacionin, ku theksoi se “kemi një tabelë të inflacionit, që ka lidhje me çmimet në rajon, kur gjatë periudhës së krizës, patëm nivelin më të ulët të inflacionit se të tjerët, edhe pse këtu si kudo çmimet u rritën”, tha Rama.
Rama tha se “Shqipëria ka nivelin më të ulët të inflacionit në të gjithë rajonin, 2,6%”.
Kryeministri, njëherësh kryetari i Partisë Socialiste, Edi Rama deklaroi se “niveli i Prodhimit të Brendshëm Bruto sot është 2,5 herë më i lartë në vetëm një dekadë. Ambicia, por edhe projeksioni ynë për 2030-n është 35 miliardë euro”.
Rama tha se “në këtë fazë të fundit të rrugës drejt 11 majit thashë të filloj nga Vlora me një prezantim faktesh pa shumë komente apo opinione, thjesht faktesh, duke nisur nga një pasqyrë e përgjithshme e zhvillimit ekonomik të Shqipërisë”.
Rama tha se “krahasuar me vendet e rajonit Shqipëria ka nivelin më të lartë të rritjes së prodhimit të përgjithshëm në rajon.
Burim i kësaj tabele është Fondi Monetar Ndërkombëtar dhe nuk është qeveria shqiptare. Kështu që nëse në rajon Prodhimi i Përgjithshëm është rritur mesatarisht 64%, në Shqipëri është rritur 109,6%”.
Duke u ndalur tek të ardhurat për frymë, Rama tha se “kur ne morëm detyrën këto të ardhura ishin 3324 euro ndërsa këtë vit janë 10 324 euro, pra 3-fish më të larta. Projeksioni ynë është që në 2030 të jenë 15 000 euro. Ky projeksion është bërë me ekspertë të MF dhe me ekspertë ndërkombëtarë që punojnë me ne”.
