Shqiptarët po marrin gjithnjë e më shumë makina nga Koreja e Jugut. Ekspertë të tregut të shit-blerjes së mjeteve të përdorura dhe tregtarë të makinave të importuara nga Koreja e Jugut i thanë ekofin.al se këto makina preferohen për çmimet e leverdisshme, krahasuar me mjetet e importuara nga vende të tjera, si Gjermania e Italia.
Referuar shifrave të fundit, të publikuara nga Drejtoria e Përgjithshme e Shërbimeve të Transportit Rrugor, në Shqipëri numërohen 20,371 mjete të regjistruara vetëm në janar-mars 2025 dhe 82% e totalit janë autovetura.
Në tremujorin e parë të vitit 2025, dominojnë mjetet me origjinë koreane, me 29%. Importet nga vendet e tjera vijnë me diferencë shumë më të madhe. Kështu, mjetet gjermane zinin 16.7% të importeve, ato italiane 15.3%; zvicerane me 8.1%; kineze me 7% dhe amerikane 6.9%.
Po sipas të dhënave, gjatë periudhës janar – mars 2025 është rinovuar flota me 2869 mjete të tre viteve të fundit. Kjo shifër është 36% më shumë krahasur me të njëjtën periudhë për vitin 2023.
Ndërkohë po në rritje janë shifrat e çregjistrimit të përhershëm të mjete të vjetra. Për këtë tremujor të parë të vitit 2025 numërohen 1875 të tilla ose 12% më shumë krahasuar me vitin 2024. /ekofin.al
