Hyrjet e shtetasve të huaj u rritën me 15.9% krahasuar me një vit më parë. Vetëm në muajin maj, Shqipëria priti mbi 1.8 milion hyrje të qytetarëve shqiptarë dhe të huaj.
Shqipëria po hyn në sezonin veror me ritme të forta turistike. Të dhënat e publikuara nga INSTAT tregojnë se gjatë muajit maj 2026 në territorin shqiptar kanë hyrë 1.88 milion shtetas shqiptarë dhe të huaj, ose 12.2% më shumë krahasuar me të njëjtën periudhë të vitit të kaluar.
Pesha kryesore e kësaj rritjeje vjen nga turistët dhe vizitorët e huaj. Në maj u regjistruan 1.14 milion hyrje të shtetasve të huaj, një shifër rekord që përfaqëson një rritje prej 15.9% krahasuar me majin e vitit 2025. Ndërkohë, hyrjet e shtetasve shqiptarë arritën në 736 mijë, me një rritje prej 6.9%.
Edhe në periudhën janar-maj 2026, flukset hyrëse kanë vijuar trendin pozitiv. Në pesë muajt e parë të vitit, Shqipëria ka regjistruar mbi 7 milion hyrje, ose 8.4% më shumë se një vit më parë. Vetëm hyrjet e të huajve kanë arritur në 3.7 milion persona.
Evropa mbetet tregu dominues për turizmin shqiptar. Sipas INSTAT, nga 1.14 milion shtetas të huaj që hynë në vend gjatë majit, mbi 1.07 milion vinin nga vendet europiane. Brenda kontinentit, Evropa Jugore zë peshën kryesore me rreth 749 mijë vizitorë, e ndjekur nga Evropa Perëndimore me mbi 129 mijë hyrje.
Të dhënat tregojnë gjithashtu se 98% e hyrjeve të shtetasve të huaj kanë pasur qëllime personale, kryesisht pushime, vizita familjare dhe aktivitete turistike. Ky segment është rritur me 16.4% krahasuar me majin e vitit të kaluar, ndërsa hyrjet për qëllime biznesi dhe profesionale kanë shënuar rënie me 5.6%.
Nga ana tjetër, daljet nga territori shqiptar arritën në 1.8 milion persona, me një rritje prej 8.9% në raport me majin 2025. Nga këta, mbi 1 milion ishin shtetas të huaj dhe rreth 736 mijë shtetas shqiptarë.
Shifrat konfirmojnë se Shqipëria po konsolidon pozicionin e saj si një nga destinacionet me rritjen më të shpejtë turistike në rajon, ndërsa operatorët e tregut presin që muajt e verës të sjellin flukse edhe më të larta vizitorësh./ekofin.al
