Bordi i Transparencës ka reflektuar një tjetër ulje të çmimeve të karburanteve në vendimin e datës 29 prill 2026, duke konfirmuar një trend zbutjeje pas luhatjeve të javëve të fundit.
Nga vendimi i fundit, çmimi tavan i naftës (gazoil) për shitje me pakicë është ulur në 203 lekë/litër, nga 206 lekë/litër që ishte në vendimin paraardhës, ndërsa benzina ka zbritur në 180 lekë/litër, nga 181 lekë/litër. Edhe në shumicë ka pasur rënie, me gazoilin në 191 lekë/litër dhe benzinën në 168 lekë/litër.
Kjo lëvizje konfirmon një korrigjim të lehtë në rënie të tregut vendas, në një kohë kur çmimet mbeten ende relativisht të larta krahasuar me nivelet e fillimvitit. Ulja, megjithëse modeste, sinjalizon një reflektim të zhvillimeve në tregjet ndërkombëtare, por edhe të mekanizmit të kontrollit të vendosur nga bordi.
Ndërkohë, një element me rëndësi është fakti se çmimet aktuale mbeten nën pragjet e përcaktuara nga Akti Normativ i 3 prillit 2026, çka do të thotë se nuk aktivizohet ulja e akcizës. Për rrjedhojë, taksa e akcizës vijon të aplikohet në nivelin e plotë 100%, ndryshe nga skenari kur çmimet kalojnë 220 lekë/litër për naftën dhe 200 lekë/litër për benzinën, ku parashikohet reduktimi në 80%.
Në këtë kontekst, ulja e çmimeve vjen më shumë si efekt i tregut sesa i ndërhyrjes fiskale, duke lënë të hapur debatin mbi efektivitetin e mekanizmave të stabilizimit dhe ndikimin real te konsumatorët dhe bizneset. /ekofin.al
