Pandemia e Covid 19 do të vazhdojë edhe për një vit, sipas OBSH-së. Shkak për këtë është mosfurnizimi i vendeve të varfra me vaksina anti Covid.
Drejtuesi i lartë i OBSH-së, Bruce Aylward, tha se situata në vendet e varfra jep sinjale se kriza e pandemisë “mund të vazhdojë edhe në vitin 2022”. Më pak se 5% e popullsisë së Afrikës janë vaksinuar, krahasuar me 40% në shumicën e kontinenteve të tjera.
Aylward u bëri thirrje vendeve të pasura që të heqin dorë nga porositë e vaksinave. Kjo do të mundësonte kompanitë farmaceutike që t’u japin përparësi vendeve me të ardhura më të ulëta.
“Mund t’ju them se nuk jemi në rrugën e duhur. Ne me të vërtetë duhet ta përshpejtojmë (vaksinimin) ose e dini çfarë? Pandemia do të vazhdojë për një vit më shumë sesa duhet“, tha ai.
Programi global për shpërndarjen e vaksinave në vendet e varfra, COVAX, planifikonte të shpërndante dy miliardë doza vaksinash deri në fund të këtij viti. Por deri tani ka dërguar vetëm 371 milionë doza.
