Këtë të hënë startoi një nga ngjarjet më të rëndësishme të komunitetit të biznesit dhe start up-eve në vend: Java Globale e Sipërmarrjes 2025, një platformë botërore që çdo vit mobilizon mbi 40,000 aktivitete në më shumë se 200 shtete, duke angazhuar rreth 10 milionë pjesëmarrës. Shqipëria, e cila vitet e fundit po afirmon rolin e saj në këtë skenë globale, këtë vit shtrin aktivitetet jo vetëm në Tiranë, por edhe në Durrës, Elbasan, Vlorë dhe Shkodër, me fokus të veçantë në inovacion, zhvillimin e start up-eve dhe inteligjencën artificiale.
Gjatë hapjes zyrtare, ministrja e Ekonomisë dhe Inovacionit, Delina Ibrahimaj, theksoi se Java e Sipërmarrjes do të shërbejë si platformë për prezantimin e dy raporteve të rëndësishme për zhvillimin ekonomik të vendit. “Për herë të parë, gjatë kësaj jave do të prezantohet Raporti i Ekosistemit të Start Up-eve, i hartuar në bashkëpunim me Startap – një identitet i njohur ndërkombëtarisht – i cili mat nivelin e zhvillimit të ekosistemit tonë. Po ashtu, do të publikohet edhe Raporti i Trendeve të Vendeve të Punës në sektorin e Teknologjisë së Informacionit,” u shpreh Ibrahimaj.
Ajo shtoi se mbështetja për inovacionin do të fuqizohet edhe nëpërmjet paketës së re fiskale. “Nga viti i ardhshëm, të gjitha sponsorizimet dhe financimet për ekosistemin e start up-eve do të njihen si shpenzim i zbritshëm, deri në 5% të fitimit para tatimit, një instrument i rëndësishëm që synon të nxisë investimet në teknologji dhe inovacion.”
Programi i zgjeruar i Javës Globale të Sipërmarrjes
Për të dytin vit radhazi, Ekofin.al pasqyron gjerësisht programin e kësaj jave, e cila sjell dhjetëra aktivitete të dedikuara për sipërmarrësit, të rinjtë inovatorë, investitorët, akademinë dhe aktorët e ekosistemit digjital.
Në vijim të kësaj jave, janë planifikuar:
• Konferenca me folës kombëtarë dhe ndërkombëtarë, përfshirë ekspertë të inovacionit, themelues të start up-eve të suksesshme dhe drejtues të institucioneve mbështetëse.
• Masterclass dhe leksione nga liderë të biznesit, të cilët ndajnë praktikat më të mira në menaxhim, financim, rritje të bizneseve dhe përdorim të teknologjive të reja.
• Sesione trajnimi dhe mentorimi, që synojnë zhvillimin e aftësive digjitale, aftësive sipërmarrëse dhe përgatitjen për skenën e pitch-eve.
• Panele të dedikuara për gratë sipërmarrëse, me fokus në rrjetëzim, rritje dhe akses në financim.
• Vizita në biznese inovative, ku pjesëmarrësit njihen nga afër me modelet më të avancuara të zhvillimit të produkteve dhe shërbimeve.
• Lançime produktesh, ide të reja biznesi dhe raporte sektoriale, përfshirë raportin mbi potencialin e AI në ekonominë shqiptare dhe trendet e punësimit në sektorin ICT.
Aktivitetet kulmore të javës pritet të zhvillohen në mënyrë të kombinuar – fizikisht dhe online – duke iu dhënë mundësi pjesëmarrësve nga e gjithë Shqipëria të jenë pjesë e nismës.
Java Globale e Sipërmarrjes synon jo vetëm të evidentojë talentin dhe dinamikën e ekosistemit shqiptar, por edhe të shërbejë si urë lidhjeje mes sipërmarrësve të rinj, investitorëve dhe institucioneve mbështetëse, duke përforcuar rolin e Shqipërisë në hartën globale të inovacionit.
