Euro ka shënuar një tjetër rënie në tregun valutor vendas, duke u këmbyer për herë të parë poshtë kufirit psikologjik të 97 lekëve. Monedha e përbashkët nisi javën në kuotën e 96.9 lekëve, pas mbylljes së javës së kaluar me një euro të barazvlefshme me 97 lekë.
Kjo lëvizje ka befasuar aktorët e tregut, pasi zhvlerësimi i euros po ndodh në një moment kur sezoni turistik veror është drejt fundit dhe, sipas logjikës ekonomike, efekti i hyrjeve të mëdha të valutës në vend pritej të zbehej. Megjithatë, oferta e lartë e euros në treg, e ndikuar nga remitancat dhe hyrjet e kapitalit të huaj, ka vijuar të ushtrojë presion në forcimin e Lekut.
Faktorët që po e shtyjnë kursin poshtë
Ekspertët e tregut valutor rendisin disa arsye që po mbajnë të fortë Lekun, duke veçuar hyrjet e larta të valutës nga turizmi dhe remitancat, që vijojnë ende edhe në fillim të shtatorit, investimet e huaja direkte dhe projektet e mëdha infrastrukturore që sjellin euro në vend, dobësimi i vetë euros në tregjet ndërkombëtare, por edhe flukset e larta informale të parasë në qarkullim, që çrregullojnë dhe prishin çdo parashikim të logjikshëm ekonomik.
Sa do të zgjasë ky trend?
Sipas analistëve financiarë, rënia e euros nën 97 lekë nuk pritet të jetë e përhershme. Me përfundimin e sezonit turistik, hyrjet e valutës nga turistët do të ulen, çka mund të rrisë gradualisht kërkesën për euro dhe të sjellë një rikthim të saj në kuotat 98–100 lekë. Megjithatë, nëse remitancat mbeten të larta dhe oferta e valutës së huaj vijon të tejkalojë kërkesën, Leku mund të ruajë përkohësisht forcën e tij edhe në muajt në vijim.
Efektet për ekonominë
Një euro e dobët ka efekte të ndara, ku është pozitive për importuesit dhe për individët që shlyejnë kredi në euro, pasi redukton kostot. Por në anën tjetër ka efekte negative për eksportuesit dhe për ata që marrin të ardhura në euro, të cilët përballen me më pak fitime nëse i kthejnë në Lekë. Kursi i këmbimit mbetet kështu një ndër zhvillimet më të ndjekura të ditëve të fundit, teksa tregu po pret me interes nëse kjo rënie nën 97 lekë është thjesht një luhatje kalimtare, apo shenjë e një tendence më afatgjatë të forcimit të Lekut. /ekofin.al
