Botohet në Fletoren Zyrtare vendimi i qeverisë që ka miratuar kuotat e përgjithshme të kredive të reja të lehtësuara për punonjësit e administratës publike për vitin 2026.
Në total do të jepen 300 kredi për blerjen e banesave, me normë interesi 0%.
Numrin më të madh të kuotave e përfiton Ministria e Shëndetësisë dhe Mbrojtjes Sociale me 100 kredi, e ndjekur nga Ministria e Mbrojtjes dhe Ministria e Arsimit me nga 70 kredi secila. Ministria e Punëve të Brendshme përfiton 40 kredi, ndërsa 20 kredi janë rezervuar për Policinë e Burgjeve.
Përzgjedhja e përfituesve do të bëhet përmes një sistemi pikëzimi, ku vlerësohen kushtet e strehimit, gjendja familjare dhe sociale, vitet e punës në administratë, si dhe niveli i pagës. Prioritet do të kenë punonjësit që nuk disponojnë banesë në pronësi, ata që jetojnë në banesa të mbipopulluara, familjet e reja, si dhe punonjësit e prekur nga zhvendosja ose prishja e banesave për shkak të investimeve publike apo vendimeve gjyqësore.
Për punonjësit e arsimit, ndër kriteret prioritare përfshihen edhe mësuesit e emëruar në institucione arsimore larg vendbanimit, familjet ku të dy bashkëshortët janë të punësuar në sistemin arsimor, si dhe ata me kohë të gjatë pune në sektor.
Vendimi parashikon që përfituesit e përzgjedhur të marrin kredi të lehtësuar me interes 0%, ndërsa zbatimi i skemës do të ndiqet nga ministritë përkatëse. Kuotat janë të vlefshme për vitin 2026 dhe vendimi ka hyrë tashmë në fuqi pas botimit në Fletoren Zyrtare.
