Shqiptarët vijojnë të udhëtojnë gjithnjë e më shumë, si brenda vendit ashtu edhe jashtë tij. Sipas të dhënave të publikuara nga Instituti i Statistikave (INSTAT), gjatë vitit 2025 banorët e Shqipërisë të moshës 15 vjeç e lart realizuan rreth 4.5 milionë udhëtime për qëllime personale dhe biznesi, duke konfirmuar një tendencë të fortë të rritjes së lëvizshmërisë dhe aktivitetit turistik.
Pjesa më e madhe e këtyre udhëtimeve, rreth 97.6%, u kryen për qëllime personale, ndërsa vetëm 2.4% kishin karakter biznesi. Nga totali i përgjithshëm, rreth 4.4 milionë udhëtime u realizuan për arsye personale dhe afërsisht 100 mijë për qëllime pune apo biznesi.
Muajt më aktivë për udhëtime rezultuan të jenë gushti, me 12.6% të totalit vjetor, i ndjekur nga qershori me 10.9%, dhjetori me 10.2% dhe korriku me 9.8%, duke treguar se sezoni veror vijon të mbetet periudha kryesore e lëvizjeve turistike, ndërsa fundviti shënon gjithashtu një fluks të konsiderueshëm udhëtimesh.
Të dhënat tregojnë se “pushimet dhe koha e lirë” përbëjnë motivin kryesor të udhëtimeve brenda Shqipërisë, duke zënë 52.8% të totalit, ndërsa për udhëtimet jashtë vendit arsyeja më e zakonshme mbetet vizita tek të afërmit dhe miqtë, me 52.0%.
Një nga zhvillimet më të rëndësishme të vitit 2025 është rritja me 14.3% e udhëtimeve jashtë Shqipërisë krahasuar me vitin paraardhës, çka tregon një rikthim të fuqishëm të interesit të shqiptarëve për destinacionet ndërkombëtare. Paralelisht, transporti ajror regjistroi rritjen më të madhe, me afro 14%, duke reflektuar zgjerimin e mundësive të udhëtimit dhe rritjen e përdorimit të linjave ajrore.
Sa i përket akomodimit, shqiptarët kanë preferuar gjithnjë e më shumë platformat e qiradhënies afatshkurtër, si Airbnb dhe forma të ngjashme, të cilat shënuan një rritje prej 5.9%, ndërsa qëndrimet në hotele u rritën me 5.6% krahasuar me vitin 2024.
Mesatarisht, çdo udhëtim i realizuar gjatë vitit 2025 ka zgjatur 5.3 netë, ndërsa numri më i lartë i netëve të qëndrimit është regjistruar gjatë muajve korrik dhe gusht, duke konfirmuar peshën dominuese të sezonit veror në turizmin e shqiptarëve.
Brenda vendit, destinacioni më i preferuar rezulton të jetë qarku i Tiranës, i cili ka tërhequr 13.7% të udhëtimeve, i ndjekur nga Vlora me 12.2%, ndërsa Korça dhe Durrësi ndajnë nga 7.3% secili. Për udhëtimet jashtë Shqipërisë, Italia mbetet destinacioni kryesor me 11.3% të totalit, e ndjekur nga Greqia me 10.4%, Gjermania me 4%, si dhe vende të tjera si Turqia, Spanja dhe Mali i Zi.
Rezultatet e Anketës së Turizmit “Pushime dhe Udhëtime” për vitin 2025 tregojnë se shqiptarët po udhëtojnë më shpesh, po zgjedhin më shumë destinacione ndërkombëtare dhe po diversifikojnë mënyrat e transportit dhe akomodimit, duke reflektuar një transformim të vazhdueshëm të sjelljes turistike dhe të konsumit të kohës së lirë./ekofin.al
